12 Евангелий на Утрени Великого Пятка

 

Рече́ Господь Своим ученико́м, *Ныне просла́вися Сын Человеческии,  и Бог просла́вися о Нем, и Бог прославит Его в Себе, и а́бие прославит Его. Ча́дца, еще́ с вами мало есмь. Взы́щете Мене́. И якоже рех июде́ом, яко а́мо же Аз иду́, вы не можете приити́. И вам глаголю ныне, заповедь новую даю вам, да люби́те друг друга, якоже возлюбих вы, да и вы люби́те себе. О сем разумеют вси, яко Мои ученицы́ есте́, аще любовь и́мате между собою. Глагола Ему Си́мон Петр, Господи, ка́мо и́деши; отвеща́ ему Исус, амо же Аз иду́, не можеши ныне по Мне ити́, последи́ же по Мне и́деши. Глагола Ему Петр, Господи, почто не могу ныне по Тебе ити́, ныне душу мою за Тя положю́. Отвеща ему Исус, душу ли твою за Мя положи́ши; аминь аминь глаголю тебе, не возгласит алекто́р, до́ндеже отве́ржешися Мене три́щи. Да не смущается сердце ваше, веруйте в Бога, и в Мя веруйте. В дому́ Отца Моего обители многи суть. А́ще ли же ни́, рекл бых вам, иду угото́вати место вам. И аще уготовлю место вам, па́ки прииду́, и пойму́ вы к Себе. Да иде́же есмь Аз, и вы будете. И а́може Аз иду ве́сте, и путь ве́сте. Глагола Ему Фома, Господи, не ве́мы ка́мо и́деши, и ка́ко можем путь ве́дети. Глагола ему Исус, Аз есмь путь, и истина, и живот, никто же прии́дет ко Отцу, токмо Мною. Аще Мя бы́сте знали, и Отца Моего знали бы́сте у́бо. И отсе́ле позна́сте Его, и ви́десте Его. Глагола Ему Филипп, Господи, покажи нам Отца, и довле́ет нам. Глагола ему Исус, толи́ко время с вами есмь, и непозна́ Мене Фили́ппе; ви́девыи Мене́, ви́де Отца. И ка́ко ты глаго́леши, покажи нам Отца. Не ве́руеши ли яко Аз во Отце, и Отец во Мне есть. Глаго́лы яже Аз глаголю вам, от Себе́ не глаголю. Отец же во Мне пребыва́яи, Той творит дела́. Веруйте Мне, яко Аз во Отце, и Отец во Мне. А́ще ли же ни́, за та́ де́ла веру и́мете Ми. Аминь аминь глаголю вам, ве́руяи в Мя, де́ла яже Аз творю, и той сотворит, и бо́лша сих сотворит. Яко Аз ко Отцу Моему гряду́. И е́же а́ще что про́сите от Отца о имени Моем, то́ сотворю, да прославится Отец в Сыне. И а́ще чесо́ про́сите во имя Мое, Аз сотворю. Аще лю́бите Мя, заповеди Моя соблюди́те. И Аз умолю Отца, и ино́го Уте́шителя даст вам, да будет с вами в век, Дух Истинныи. Его же мир не может прия́ти яко не видит Его, ниже́ знает Его. Вы же знаете Его, яко в вас пребывает, и в вас будет. Не оставлю вас си́ры, прииду́ к вам. Еще́ мало, и мир к тому́ не видит Мене́, вы же ви́дите Мя, яко Аз живу́, и вы жи́ви будете. В той день разуме́ете вы, яко Аз во Отце́ Мое́м, и вы во Мне, и Аз в вас. Име́яи за́поведи Моя́, и соблюда́я их, той есть любя́и Мя. А любя́и Мя, возлю́блен будет Отце́м Моим. И Аз возлюблю его, и явлю́ся ему Сам. Глаго́ла Ему Июда неискарио́тскии, Господи, и что́ бысть, яко нам хо́щеши яви́тися, а не ми́рови; отвеща́ Исус, и рече́ ему, аще кто любит Мя, слово Мое́ соблюде́т. И Отец Мой возлю́бит его. И к нему́ прии́дема, и обитель у него сотвори́ма. Не любя́и Мя, слове́с Моих не соблюда́ет. И слово е́же слы́шасте, несть Мое́, но пославшаго Мя Отца. Сия́ глаго́лах вам, в вас сы́и. Уте́шитель же Дух Святы́и, Егоже по́слет Отец во имя Мое, Той вы нау́чит всему́, и воспомяне́т вам вся яже рех вам. Мир оставляю вам, мир Мой даю вам, не я́коже мир дае́т, Аз даю вам. Да не смуща́ется сердце ваше ни устраша́ет. Слы́шасте яко Аз рех вам, иду́ и прииду́ к вам. А́ще бы́сте любили Мя, возра́довалися бы́сте у́бо, яко рех иду ко Отцу, яко Отец Мой бо́лии Мене́ есть. И ныне рех вам, пре́жде даже не бу́дет. Да егда́ будет, веру и́мете. К тому не мно́го глаго́лю с вами, гряде́т бо сего мира князь, и во Мне не и́мать ничесо́же. Но да разуме́ет мир, яко люблю Отца. И я́коже запове́да Мне Отец, та́ко творю́. Воста́нете и́дем отсю́ду. Аз есмь лоза истинная. И Отец Мой де́латель есть. Вся́ку ро́згу о Мне не творя́щую плода́, и́змет ю́. И вся́ку творя́щую плод, отреби́т ю́, да мно́жайшии плод принесе́т. У́же вы чи́сти есте́, за́слово е́же глаго́лах вам, будете во Мне, и Аз в вас. Я́коже розга́ не может плода́ сотвори́ти о себе́, а́ще не будет на лозе́. Та́ко и вы, а́ще во Мне не пребу́дете. Аз е́смь лоза, вы же ро́ждие. И и́же будет во Мне, и Аз в нем той сотвори́т плод мно́г. Яко без Мене́ не можете твори́ти ничесо́же. А́ще кто во Мне не пребу́дет, изве́ржется вон, я́ко же розга́, и изсы́шет, и собира́ют ю́, и во о́гнь влага́ют, и сгара́ет. А́ще пребу́дете во Мне, и глаго́лы Мои в вас пребу́дут. Ему же а́ще хо́щете, проси́те, и будет вам. О се́м просла́вися Отец Мой, да плод мног сотворите́, и будете Мои ученицы́. Яко же возлюби́ Мя Отец, и Аз возлюби́х вас. Бу́дите в любви́ Моей, а́ще заповеди Моя соблюде́те, пребу́дете в любви Моей. Я́коже Аз заповеди Отца Моего соблюдо́х, и пребыва́ю в Его любви, сия́ глаго́лах вам, да радость Моя в вас будет, и радость ваша испо́лнится. Си́ есть заповедь Моя, да люби́те друг друга, я́коже возлюби́х вы́. Бо́лши сея́ любве́ никто́же и́мать, да кто ду́шю свою положи́т за́други своя́. Вы дру́зи Мои есте́, а́ще творите́ ели́ка Аз запове́даю вам. Не к тому вас глаго́лю рабы́. Яко раб, не ве́сть что творит госпо́дь его. Вас же реко́х дру́ги, яко вся я́же слы́шах от Отца Моего, сказах вам. Не вы Мене́ избра́сте, но Аз избра́х вас и положи́х, да вы и́дете, и плод принесе́те. И плод ваш пребу́дет. Да его́же а́ще про́сите от Отца во имя Мое́, даст вам. Си́ заповедаю вам, да люби́те друг друга. А́ще мир вас ненавидит, ве́дите яко Мене́ прежде вас возненави́де. А́ще о́т мира бы́сте были, мир у́бо свое́ любил бы. Я́коже о́т мира не́сте, но Аз избра́х вы́ о́т мира, сего́ ради ненавидит вас мир. Помина́йте слово, е́же Аз рех вам, не́сть раб бо́лии Господа своего. А́ще Мене́ изгна́ша, и вас иждену́т. А́ще слово Мое́ соблюдо́ша, и ваше соблюду́т. Но сия́ вся́ творят вам за́ имя Мое, я́ко не ве́дят посла́вшаго Мя. А́ще не бы́х пришел и глаго́лал им, греха́ не бы́ша име́ли. Ны́не же вины́ не и́мут о гресе́ свое́м. Ненави́дяи Мене́, и Отца Моего ненавидит. А́ще дел не бы́х сотвори́л в них, их же и́н никто́же сотвори́, греха не бы́ша име́ли. Ныне же и ви́деша, и возненави́деша Мене́, и Отца Моего. Но да сбудется слово пи́саное в законе их, я́ко возненави́дяше Мя ту́не. Егда́ же прии́дет Уте́шитель, Его же Аз послю вам от Отца, Дух И́стинныи, и́же от Отца исхо́дит, Той свиде́тельствует о Мне. И вы же свиде́тельствуете, я́ко искони́ со Мною есте́. Сия́ глаго́лах вам, да не соблазните́ся, от со́нмищ иждену́т вы. Но прии́дет час, да всяк и́же убие́т вы, мни́тся службу приноси́ти Богу. И сия́ сотворя́т, я́ко не позна́ша Отца, ни Мене́. Но сия́ глаго́лах вам, да егда́ прии́дет час, поминайте се́, я́ко А́з рех вам, сих же вам испе́рва не ре́х, я́ко с вами бе́х. Ныне же иду́ к Пославшему Мя. И никто́же от вас вопроша́ет Мене́ ка́мо и́деши; но я́ко сия́ глаго́лах вам, ско́рби испо́лних сердца́ ва́ша. Но Аз истину вам глаголю, у́не есть вам, да Аз иду́. А́ще бо нейду́ Аз, Уте́шитель не прии́дет к вам. А́ще ли же иду́, послю́ Его к вам. И прише́д Он, обличи́т ми́ра, о гресе́, и о правде, и о суде́. О гресе́ у́бо, я́ко не ве́руют в Мя́. О правде же, я́ко ко Отцу Моему иду, и к тому́ не ви́дите Мене́. О суде́ же, я́ко князь мира сего́ осужде́н бы́сть. Еще́ много и́мам глаго́лати вам, но не мо́жете носи́ти ны́не. Егда́ же прии́дет Он, Дух И́стинныи, наста́вит вы́ на вся́ку истину. Не о себе́ бо глаго́лати и́мать, но ели́ка а́ще услышит, глаго́лати и́мать, и гряду́щая возвестит вам. Он Мя прославит, я́ко от Моего прии́мет, и возвести́т вам. Вся́ ели́ка и́мать Отец, Моя́ суть. Сего́ ради ре́х, я́ко от Мене́ прии́мет, и возвести́т вам. В ма́ле, и ктому́ не ви́дите Мене́. И па́ки вма́ле, и у́зрите Мя, я́ко иду́ ко Отцу. Ре́ша же от учени́к Его к себе́, что есть се́ е́же глаго́лет нам, вма́ле, и не ви́дите Мене́. И па́ки вма́ле, и у́зрите Мя. И я́ко Аз иду ко Отцу. Глаго́лаху у́бо, что се́ есть, е́же глаго́лет вма́ле, не ве́мы что глаго́лет. Разуме́ же Исус, я́ко хотя́ху Его вопраша́ти, и рече́ им, о се́м ли стяза́етеся между́ собо́ю, я́ко рех вма́ле, и не ви́дите Мене́. И па́ки вма́ле, и у́зрите Мя̀; аминь аминь глаголю вам, я́ко воспла́четеся и возрыда́ете вы, а мир возра́дуется. Вы же печа́лни бу́дете. Но печаль ваша, в радость будет. Жена́ егда́ ражда́ет, скорбь и́мать, я́ко прии́де год ея́. Егда́ же родит отроча́, к тому́ не помнит ско́рби за радость, я́ко роди́ся человек в мир. И вы же печаль и́мате у́бо ныне. Па́ки же узрю́ вы, и возра́дуется сердце ваше, и радости ва́шея, никто́же во́змет от вас, и в то́й день, Мене́ не вопро́сите ничесо́же. Аминь аминь глаго́лю вам, я́ко ели́ка а́ще чесо́ про́сите от Отца во имя Мое́, даст вам. До се́ле непроси́сте ничесо́ же во́ имя Мое́. Проси́те, и прии́мете, да радость ваша испо́лнена будет. Сия́ в притчах глаго́лах вам. Но прии́дет час, егда́ ктому́ в притчах не глаго́лю вам, но я́ве о Отце́ возвещю́ вам. В той день во́ имя Мое́ вопро́сите, и не глаго́лю вам, я́ко Аз умолю́ Отца о вас. Сам бо Отец любит вы́, я́ко вы́ Мене́ возлюби́сте, и ве́ровасте. Я́ко Аз от Бога изыдо́х, изыдо́х от Отца, и приидо́х в мир. И па́ки оставляю мир, и иду́ ко Отцу. Глаго́лаша Ему ученицы́ Его, се́ ныне необину́яся глаго́леши, а при́тчи ни коея́же не глаго́леши. Ныне ве́мы я́ко ве́си вся, и нетре́буеши да кто Тя вопроша́ет. О се́м веруем, я́ко от Бога изше́л еси́. Отвеща́ им Исус, ныне ли ве́руете; се́ гряде́т час, и ныне прии́де, да разы́детеся ко́ждо во своя́, и Мене́ единого оста́вите, и не́смь еди́н, я́ко Отец со Мною е́сть. Сия́ глаго́лах вам, да во Мне мир и́мате. В мире ско́рбни будете. Но дерзайте, я́ко Аз победи́х мир. Сия́ глаго́ла, Исус, и возведе́ очи Свои на́ небо и рече́, Отче, прии́де час, просла́ви Сына Своего, да и Сын Твой просла́вит Тя́. Я́коже дал еси́ Ему власть вся́коя плоти. Да вся́ко е́же дал еси́ Ему, даст им живо́т ве́чныи. Се́же есть живо́т ве́чныи, да знают Тебе́ еди́ного и́стиннаго Бога, и Егоже посла́ Исус Христа́. Аз просла́вих Тя́ на земли́. Дело сверши́х е́же дал еси́ Мне да сотворю́. И ныне просла́ви Мя Ты Отче, у Тебе́ Самого́, сла́вою ю́же име́х у Тебе́ прежде мир не бы́сть. Яви́х имя Твое челове́ком. Их же дал еси́ Мне от мира, Твои бе́ша, и Мне их дал еси́, и слово Твое сохрани́ша. Ныне разуме́ша я́ко вся́ ели́ка дал еси́ Мне, о Тебе́ су́ть. Я́ко глаго́лы их же дал еси́ Мне, да́х им. И ти́и прия́ша, и разуме́ша вои́стину, я́ко от Тебе изыдо́х. И ве́роваша я́ко Ты Мя посла́. Аз о си́х молю. Не о все́м мире молю, но о тех и́х же дал еси́ Мне, я́ко Твои су́ть. И Моя́ вся, Твоя су́ть. И Твоя́ Моя́, и просла́вихся в них. И ктому́ не́смь в ми́ре. И си́и в мире су́ть, и Аз к Тебе гряду́. Отче Святы́и, соблюди́ их во имя Твое́, и́хже дал еси́ Мне, да будут еди́но я́коже и Мы. Егда́ бе́х с ними в ми́ре, Аз соблюда́х их во́ имя Твое́. И́х же дал еси́ Мне́, сохрани́х. И никто́же от них поги́бе, то́кмо сын поги́бельныи. Да сбудется писание. Ны́не же к Тебе гряду́. И сия́ глаго́лю в мире, да и́мут радость Мою, испо́лнену в себе. Аз да́х им слово Твое́, и мир возненави́де их, я́ко не́ суть о́т мира, я́коже и Аз о́т мира не́смь. Не молю́ да во́змеши их о́т мира, но да соблюде́ша их от неприя́зни. О́т мира не́ суть, я́коже и Аз о́т мира не́смь. Святи́ их во и́стину Твою. И слово Твое́ истина е́сть. Я́коже Мене́ посла́ в мир, и Аз посла́х их в мир. И за ни́х Аз свящю́ Себе́, да и ти́и будут свяще́ни вои́стину. Не о си́х же молю́ то́кмо, но и о ве́рующих словесе́ и́х ра́ди в Мя́, да вси́ еди́но су́ть. Я́коже Ты Отче во Мне, и Аз в Тебе, да и ти́и в Нас еди́но будут. Да и мир веру и́мет, я́ко Ты Мя посла́. И Аз славу ю́же да́л еси́ Мне, да́х им, да будут еди́но, я́коже Мы еди́но есма́. Аз в них, и Ты во Мне, да будут сверше́ни во еди́но. И да разуме́ет мир, я́ко Ты Мя посла́. И возлюбил их еси́, я́коже Мене́ возлюби́л еси́. О́тче, и́хже дал еси́ Мне, хощу́ да иде́же есмь Аз, и ти́и будут со Мно́ю, да видят славу Мою, ю́же дал еси́ Мне. Я́ко возлюби́л Мя еси́ пре́жде сложе́ния ми́ра. Отче пра́ведныи, и мир Тебе́ не позна́, Аз же Тя позна́х. И си́и позна́ша, я́ко Ты Мя посла́. И сказа́х им имя Твое, и скажу́. Да любы́ ею́ же Мя еси́ возлюби́л, в них будет, и Аз в них. И сия́ рек Исус, изы́де со ученики́ Своими, на о́н по́л пото́ка ке́дрска, иде́же бе́ вертогра́д, во́ньже вни́де Сам, и ученицы́ Его*.

Во́ время о́но, изы́де Исус *со ученики́ Своими, на он пол потока ке́дрска, идеже бе вертоград, воньже вни́де Сам, и ученицы́ Его. Ве́дяше же Июда предая́и Его место, яко мно́жицею собира́шеся Исус ту, со ученики́ Своими. Ию́да же прие́м спиру, и от архиерей и фарисей слуги́, прии́де тамо со свети́лы и свеща́ми и оружии. Исус же ве́дыи вся грядущая нань, изше́д рече́ им, кого ищете; отвеща́ша Ему, Исуса Назаряны́ня. Глагола им Исус, Аз есмь. Стоя́ше же Июда иже предая́ше Его, с ними. Да я́коже рече им, Аз есмь, идо́ша вспять, и падо́ша на земли́. Паки же вопроси́ их Исус, кого ищете; они же ре́ша, Исуса Назоре́я. Отвеща Исус, рех вам, яко Аз есмь. Аще убо Мене́ и́щете, оста́вите сих ити́. Да сбудется слово е́же рече́, яко их же дал еси́ Мне, не погуби́х от них никого же. Симон же Петр имы́и ножь извлече́ его, и уда́ри архиере́ова раба, и уре́за ему ухо десно́е. Бе́ же имя рабу, Малх. Рече́ же Исус Петро́ви, вонзи́ ножь в но́жницу. Чашю юже даст Мне Отец, не и́мам ли пи́ти ея́; спи́ра же, и ты́сящник, и слуги́ июдейския, я́ша Исуса, и связа́ша Его, и ведо́ша Его ко Анне пе́рвее, бе́ бо тесть Каиа́фе, иже бе́ архиерей лету тому. Бе́ же Каиа́фа да́выи совет июде́ом, яко у́не есть единому человеку у́мрети за́ люди. По Исусе же идя́ше Си́мон Петр и други́и ученик. Ученик же той, бе́ знаем архиере́ови. И вни́де со Исусом во двор архиере́ов. Петр же стоя́ше при две́рех вне. Изы́де убо ученик той, иже бе знаемь архиере́ови, и рече́ две́рнице, и введе́ Петра. Глаго́ла же раба две́рница Петро́ви, еда́ и ты ученик еси́ Человека Сего; глагола он, несмь. Стоя́ху же раби́ и слуги́ огнь сотво́рше, яко зима бе́, и гре́яхуся. Бе́ же с ними Петр стоя́ и гре́яся. Архиерей же вопроси́ Исуса о ученице́х Его, и о учении Его. Отвеща ему Исус, Аз не обину́яся глаголах миру. Аз всегда уча́х на со́нмищих, и в церкви, идеже вси лю́дие сне́млются. И та́й не глаго́лах ничесоже, что́ мя вопроша́еши; вопроси́ слы́шавших, что́ глаголах им; се́ си́и ве́дят яже рех Аз. Сия́же ре́кшу Ему, един от предстоящих слуг, уда́ри в лани́ту Исуса, рек, та́ко ли отвещава́еши архиере́ови; отвеща́ ему Исус, а́ще зле́ глаголах, свиде́тельствуй о зле; аще ли до́бре, что́ Мя бие́ши; посла́ же Его Анна свя́зана к Каиа́фе архиере́ови. Бе́ же Си́мон Петр стоя́ и гре́яся. Ре́ша же ему еда́ и ты от учени́к Его еси́; он же отве́ржеся, и рече́, несмь. Глагола един от раб архиере́ов, ю́жика сы́и, ему же Петр уре́за ухо, не а́з ли тя ви́дех в вертрогра́де с Ним; паки у́бо Петр отве́ржеся, и а́бие пете́л возгласи́. Ведо́ша же Исуса от Каиа́фы в прето́р, бе́ же утро. И ти́и не внидо́ша в прето́р, да не оскверня́тся, но да ядя́т фа́ску*.

Во́ время о́но, во́ини же *е́мше Исуса, ведо́ша к Каиа́фе архиере́ови, иде́же книжницы и старцы собра́шася. Петр же идя́ше по Не́м издале́ча до двора́ архиере́ова, и вшед внутрь, седя́ше со слуга́ми, видети кончину. Архиере́е же и старцы, и соньм весь, иска́ху лжесвидетельства на Исуса, яко да убию́т Его, и не обрета́ху. И многим лжесвиде́телем присту́пльшем, не обрето́ша. По́слежде же приступи́вша два лжесвиде́теля, ре́ста, сей рече́, могу́ разори́ти церковь Божию, и треми́ де́ньми создати ю́. И воста́в архиерей, рече́ Ему, ничесо́же ли не отвещава́еши, что́ си́и на Тя свидетельствуют; Исус же молча́ше. И отвещав архиерей, рече́ Ему, заклинаю Тя Богом Живым, да рече́ши нам, а́ще Ты еси Христос Сын Божии; глагола ему Исус, ты рече́. Обаче глаголю вам, отсе́ле у́зрите Сына Человеческаго седя́ща одесну́ю силы, и гряду́ща на о́блацех небесных. Тогда архиерей растерза́ ризы своя глаголя, яко хулу́ глаго́ла, что́ и еще́ требуем свидетелей; се́ ныне слы́шасте хулу́ Его, что́ ся вам мнит; они́ же отвеща́вше ре́ша, повинен есть смерти. Тогда заплева́ша лице́ Его, и па́кости Ему де́яху, о́биже за лани́ту уда́риша, глаголюще, прорцы нам Христе кто есть ударе́и Тя; Петр же вне седя́ше в дворе́, и приступи́ к нему еди́на рабыня, глаголющи, и ты бе́ со Исусом Галилейским. Он же отве́ржеся пред всеми глаголя, не вем что глаголеши. Изше́дшу же ему ко врато́м, узре́ его другая, и глагола им ту, и сей бе́ со Исусом Назоре́ом, и паки отве́ржеся с клятвою, яко не знаю Человека. Пома́ле же приступи́вше стоя́щии, ре́ша Петро́ви, воистину и ты от них еси́, ибо беседа твоя я́ве тя творит. Тогда нача́т роти́тися и кля́тися, яко не знаю Человека. И а́бие пете́л возгласи́. И помяну́ Петр глагол Исусов, рече́нныи ему, яко прежде даже пете́л не возгласи́т, трикра́ты отве́ржешися Мене́. И изше́д вон пла́кася горко*.

Во́ время о́но, ведо́ша *Исуса от Каиа́фы в прето́р, бе́ же утро. И ти́и не внидоша в прето́р, да не осквернятся, но да ядя́т фа́ску. Изы́де же Пилат к ним вон, и рече́, ку́ю речь прино́сите на Человека Сего; отвеща́ша и ре́ша ему, аще не бы был сей злодей, не бы́хом пре́дали Его тебе. Рече́ же им Пилат, поиме́те Его вы, и по закону вашему суди́те Ему. Ре́ша же ему июде́е, нам недосто́ит уби́ти никогоже. Да слово Исусово сбудется е́же рече́, назна́менуя ко́ею смертию хотя́ше у́мрети. Вни́де же паки Пилат в прето́р, и гласи́ Исуса, и рече́ Ему, Ты ли еси́ Царь Июде́иск; отвеща́ ему Исус, о себе ли ты се́ глаго́леши, или́ ини́и тебе реко́ша о Мне. Отвеща Пилат, еда аз жидови́н есмь; род Твой и архиере́е преда́ша Тя мне, что еси́ сотворил; отвеща́ Исус, царство Мое, несть от мира сего́. Аще от мира сего́ было бы царство Мое, слуги́ Моя убо подвиза́лися бы́ша, да не пре́дан бых был июде́ом. Ныне же царство Мое, несть отсю́ду. Рече же Ему Пилат, у́бо Царь ли еси́ Ты; отвеща́ Исус, ты́ глаголеши, яко Царь есмь Аз. Аз на се роди́хся, и на се приидо́х в мир, да свидетельствую истину. И всяк иже есть от истины, послушает гласа Моего. Глагола Ему Пилат, что есть истина; и се рек, па́ки изы́де ко июде́ом, и глагола им, аз ни еди́ноя вины́ обретаю в Нем. Есть же обычай вам, да еди́наго вам отпущю́ на Пасху. Хо́щете ли убо да отпущю́ вам Царя Июдейска; возопи́ша же вси глаголюще, не Сего́, но Вара́вву, бе́ же Вара́вва разбойник. Тогда у́бо Пилат поя́т Исуса, и би́ Его. И во́ини спле́тше венец от те́рния, возложи́ша Ему на главу́, и в ри́зу багря́ну облеко́ша Его, и глаго́лаху, ра́дуися Царю Июде́йскии, и бия́ху Его по лани́тама. Изы́де же паки вон Пилат, и глагола им, се́ извожю́ Его вам вон, да разуме́ете, яко в Нем ни еди́ноя вины́ обрета́ю. Изы́де же вон Исус, нося́ терно́вен венец, и багря́ну ризу. И глагола им, се Человек. Егда же ви́деша Его архиере́е и слуги́, возопи́ша глаголюще, распни́ распни́ Его. Глагола им Пилат, пойми́те Его вы и распни́те, аз бо не обрета́ю в Нем вины́. Отвеща́ша ему июде́е, мы закон и́мамы, и по закону нашему, должен есть у́мрети, яко Себе Сына Божия сотвори́. Егда же слы́ша Пилат се слово, паче убоя́ся. И вни́де в прето́р паки, и глагола Исусови, отку́ду еси́ Ты. Исус же ответа не даст ему. Глагола же Ему Пилат, мне ли не глаголеши. Не ве́си ли яко власть и́мам распя́ти Тя, и власть и́мам пусти́ти Тя; отвеща Исус, не и́маши власти ни еди́ноя на Мне, аще не бы ти дано́ свыше. Сего ради преда́выи Мя тебе, бо́лии грех и́мать. От сего́ иска́ше Пилат пусти́ти Его. Июде́е же вопияху глаголюще, аще Сего пу́стиши, не́си друг кесаре́в. Всяк и́же царя себе творя́и, проти́вится кесарю́. Пилат же слышав се́ слово, изведе́ вон Исуса, и се́де на суди́щи, на месте глаго́лемем Лифострото́н, еврейски же Гавва́фа, бе́ же пято́к Па́сце, час же яко шесты́и, и глагола июде́ом, се Царь ваш. Они же вопияху, возми возми распни́ Его. Глагола им Пилат, Царя ли вашего распну́; отвеща́ша архиере́е, не и́мамы царя, то́кмо кесаря́. Тогда же преда́ст Его им, да ра́спнется*.

Во́ время о́но, ви́дев Июда преда́выи Его, *яко осуди́ша Его, раска́явся, возврати́ три́десяте сре́бреники архиере́ом и старцем, глаголя, согреших, преда́в кровь неповинную. Они же ре́ша, что́ есть нам, ты́ у́зриши. И поверг сре́бреники в церкви, отъи́де, и ше́д удави́ся. Архиере́е же прие́мше сребреники, ре́ша, недостойно есть вложи́ти их в корва́ну, поне́же цена́ кро́ве есть. Совет же сотво́рше, купи́ша и́ми село́ скуде́льниче, в погреба́ние стра́нным. Тем же нарече́ся село́ то, село́ кро́ве, до сего дне. Тогда сбы́сться рече́ное Иереми́ем пророком глаголющем. И прия́ша три́десяте сре́бреник, це́ну цене́наго, его же цени́ша от сыно́в изра́илев, и да́ша я́ на селе́ скуде́льничи, якоже сказа мне Господь. Исус же ста пред иге́моном, и вопроси Его иге́мон глаголя, Ты ли еси Царь Июде́йскии; Исус же рече́ ему, ты глаго́леши. И егда нань глаголаху архиере́е и старцы, ничесо́же отвещава́ше. Тогда глагола Ему Пилат, не слы́шиши ли, коли́ко на Тя свидетельствуют; и не отвеща́ ему ни к еди́ному глаголу, яко диви́тися иге́мону зело́. На всяк же праздник обычай бе́ иге́мону отпуща́ти еди́ного народу свя́зня, егоже хотя́ху. Имя́ху же тогда свя́зана наро́чита, глаголемаго Вара́вва. Со́браном же им, рече́ им Пилат, кого хо́щете от обою́ отпущю́ вам, Вара́вву ли, или́ Исуса глаголемаго Христа; ве́дяше бо яко зависти ради преда́ша Его. Седя́щу же ему на суди́щи, посла́ к нему жена его, глаголющи, ничто же тебе, и праведнику Тому, много бо пострада́х днесь во сне Его ради. Архиере́е же и старцы, наусти́ша народы, да испро́сят Вара́вву, Исуса же погубя́т. Отвеща́в же иге́мон, рече́ им, кого хо́щете от обою́ отпущю́ вам; они же ре́ша, Вара́вву. Глагола им Пилат, что у́бо сотворю Исусу глаго́лемому Христу. Глаго́лаша ему вси, да ра́спят будет. Иге́мон же рече́, ко́е у́бо зло сотвори́; они же и́злиха вопияху глаголюще, да про́пят будет. Видев же Пилат, яко ничто же успевает, но паче молва бывает, прие́м воду, умы́ ру́це пред народом, глаголя, не повинен есмь от кро́ве праведнаго сего, вы у́зрите. И отвеща́вше вси лю́дие, ре́ша, кровь Его на нас, и на ча́дех наших. Тогда отпусти́ им Вара́вву, Исуса же бив преда́ст им, да Его про́пнут. Тогда во́ини иге́монови, прие́мше Исуса на суди́щи, собра́ша нань все множество во́ин. И совле́кше Его, оде́яша Его хлами́дою червле́ною. И спле́тше венец от терния, возложи́ша на главу́ Его. И трость в десни́цу Его. И покло́ньшеся на коле́ну пред Ним, руга́хуся Ему, глаголюще, ра́дуися Царю Иуде́йскии. И плю́нувше нань, прия́ша трость, и бия́ху по главе́ Его. И егда́ поруга́шася Ему, совлеко́ша с Него багряни́цу, и облеко́ша Его в ризы Его, и ведо́ша Его на пропя́тие. Исходя́ще же, обрето́ша человека Кирине́йска, именем Си́мона, и сему́ заде́ша понести́ крест Его*.

Во́ время о́но, во́ини ведо́ша Исуса внутрь двора, *е́же есть прето́р. И созва́ша всю спи́ру, и облеко́ша Его в препря́ду. И возложи́ша нань спле́тше те́рнов вене́ц. И нача́ша целовати Его, и глаголати, радуися Царю Июде́йскии. И бия́ху Его по главе́ тростию, и плюва́ху нань. И прегиба́юще коле́на, покланя́хуся Ему. И егда́ поруга́шася Ему, совлеко́ша с Него препря́ду, и облеко́ша Его в ризы Своя. И изведо́ша Его, да про́пнут Его. И заде́ша мимо ходя́щу не́коему Си́мону Кирине́ю, гряду́щу с села́, отцу Алекса́ндрову и Ру́фову, да во́змет крест Его. И приведо́ша Его на Голго́фу место. Е́же есть сказа́емо ло́бное место. И дая́ху Ему пи́ти, есмирнисме́но вино́. Он же не прия́т. И распе́ншии Его, раздели́ша ризы Его, мета́юще жре́бия оня́ кто что во́змет. Бе́ же час третии, и пропя́ша Его. И бе́ написа́ние вины́ Его напи́сано, Царь Июде́йск. И с Ним распя́ша два разбойника, еди́наго одесну́ю, и еди́наго ошу́юю Его. И сбы́сться писание, е́же глаголет. И со беззаконными  вмени́ся. И мимо ходя́щии ху́ляху Его покива́юще глава́ми своими, и и глаголюще, уа́, разоря́яи церковь, и треми́ де́ньми созида́я, спаси́ся Сам, и сни́ди с креста. Та́коже и архиере́е руга́ющеся друг ко́ другу с книжники глаголаху, и́ны спасе́, Себе́ ли не может спасти́. Христос, Царь Израилев, да сни́дет ныне с креста, да ви́дим и веру и́мем Ему*.

Во́ время о́но, прише́дше во́ини на место нарицаемое Голго́фа, е́же есть кра́ниево место. И да́ша Исусу *пи́ти оце́т с же́лчию сме́шен. И вку́шь, не хотя́ше пи́ти. Распе́нше же Его, раздели́ша ризы Его, ве́ргше жре́бия. И седя́ще стрежа́ху Его ту́. И возложи́ша верху́ главы́ Его вину́ Его напи́сану, сей есть Исус Царь Июде́йскии. Тогда распя́ша с Ним два разбойника, еди́ного одесну́ю, и еди́ного ошу́юю. Мимо ходящии же ху́ляху Его, покива́юще глава́ми своими, и глаголюще, разоря́яи церковь и треми́ де́ньми созида́я, спаси́ся Сам. А́ще Сын еси́ Божии, сни́ди с креста; та́кожде же и архиере́е ругающеся с книжники и старцы и фарисеи, глаголаху, ины́я спасе́, Себе ли не может спасти́; аще Царь Израилев есть, да сни́дет ныне с креста, и веруем в Него. Упова́ на́ Бога, да избавит ныне Его, аще хо́щет Ему. Рече́ бо, яко Божии есмь Сын. То́жде же и разбойника распя́тая с Ним, поноша́ста Ему. От шеста́го же часа́, тма бысть по всей земли, до часа́ девятаго. О девятом же часе́, возопи́ Исус гла́сом ве́лием, глаголя, Или́ Или́, лима савахфа́ни; е́же есть Боже Мой Боже Мой, вску́ю Мя еси оставил; не́цыи же от ту́ стоя́щих; слышавше, глаголаху, яко Илию́ глаша́ет Сей. И а́бие тек еди́н от них, и прие́м гу́бу испо́лнив же оцта́, и вонзе́ на́ трость, напая́ше Его. Про́чии же глаго́лаху, остави, да видим, аще прии́дет Илия́ спасти Его. Исус же па́ки возопи́в гла́сом ве́лием, испусти́ дух. И се́ заве́са церковная раздра́ся на́ двое, с вы́шняго края до ни́жняго. И земля потрясе́ся, и ка́мение распаде́ся, и гро́би отверзо́шася, и многа телеса́ усопших святых воста́ша. И изше́дше из гроб по воскресении Его, во святы́и град, и яви́шася мно́зем. Сотник же и иже с ним стрегущии Исуса, ви́девше трус, и бывшая, убояшася зело́, глаголюще, воистину Божии Сын бе́ Сей*.

Во́ время о́но, ведя́ху со Исусом *и и́на два злодея с Ним уби́ти. И егда́ приидо́ша на ме́сто, нарица́емое ло́бное, ту́ распя́ша Его: и злодея, о́вого у́бо одесну́ю, а друга́го ошу́юю. Исус же глаголаше, Отче, отпусти им, не ве́дят бо что́ творя́т; разделя́юще же ри́зы Его, мета́ху жре́бия. И стоя́ху людие зря́ще. Руга́хужеся  и кня́зи с ними, глаголюще, ины́я спасе́, да спасе́т и Себе́, а́ще Той есть Христос, Бо́жии избра́нныи. Руга́хужеся  Ему и во́ини приступающе, и оце́т приде́юще Ему, и глаго́лаху, а́ще Ты еси́ Царь Июде́йск, спаси́ся Сам. Бе́ же и написа́ние напи́сано над Ни́м, писмены́ е́ллинскими, и римскими, и еврейскими, Сей есть Царь Июде́йск. Еди́н же от обе́шеною злоде́ю, ху́ляше Его, глаголя, а́ще Ты еси́ Христос, спаси Себе и на́ю. Отвещав же други́и, преща́ше ему, глаголя, нили́ ты бои́шися Бога, яко в том же осужде́н еси́; и мы у́бо в правду, достойная бо по де́лом на́ю восприе́млева, Сей же ни еди́ного зла сотвори́. И глаголаше Исусови, помяни мя Господи, егда́ прии́деши во Царствии си́. И рече́ ему Исус, аминь глаголю тебе, днесь со Мною будеши в раи́. Бе́ же час яко шесты́и, и тма́ бысть по всей земли́, до часа́ девя́таго. И поме́рче солнце, и за́веса церковная раздра́ся посреде́. И возгла́шь гласом ве́лием Исус, рече́, Отче, в ру́це Твои предаю́ дух Мой. И сия́ рек, и́здше. Видев же сотник бы́вшее, просла́ви Бога, глаголя, вои́стину Человек Сей, пра́веден бе́. И вси прише́дшии наро́ди на позор сей, ви́дяще бывающая, бию́ще пе́рси своя, возвраща́хуся. Стоя́ху же вси зна́емии Его издале́че. И жены́ спосле́дствовавшыя Ему от Галиле́и, зря́ще сих*.

Во́ время о́но, стоя́ху *при кресте́ Исусове, Мати Его, и сестра Матере Его, Ма́риа Клео́пова, и Ма́риа Магдалы́ни. Исус же видев Матерь и ученика́ стоя́ща, егоже любля́ше, глагола Матери Своей, Же́но се́ сын Твой. Пото́м же глагола ученику, се́ Ма́ти твоя. И от того́ часа́ поя́т Ю́ во своя́ си. По се́м ве́дыи Исус, яко вся у́же соверши́шася. Да сбудется писание, глагола, жа́жду. Сосуд же стоя́ше полн оцта́. Они же испо́лнивше гу́бу оцта́, и на́ трость во́нзьше, приде́ша ко усто́м Его. Егда́ же прия́т оце́т Исус, рече́, соверши́шися. И прекло́нь главу́, преда́ст дух. Июде́е же, поне́же пято́к бе́, да не оста́нут на кресте́ телеса́ в субо́ту. Бе́ бо вели́к день тоя́ субо́ты, моли́ша Пилата, да пребию́т го́лени их, и во́змут. Приидо́ша же во́ини, и первому у́бо преби́ша го́лени, и другому распя́тому с ним. На Исуса же прише́дше, яко ви́деша Его у́же уме́рша, не преби́ша Ему го́лении, но еди́н от во́ин копие́м ре́бра Ему прободе́, и а́бие изы́де кровь и вода. И ви́девыи, свиде́тельствова, и и́стинно есть свидетельство его. И той весть яко истину глаголет, да вы́ веру и́мете. Бы́ша бо сия́, да сбудется писание, кость не сокруши́тся от Него. И па́ки другое писание глаголет, во́ззрят на́нь Его же прободо́ша*.

Во́ время о́но, *прии́де Иосиф, и́же от Аримафе́я, благообра́зен советник. И́же и той бе́ ча́я Царствия Божия. Дерзну́в вни́де к Пилату, и проси́ тело Исусово. Пилат же диви́ся, а́ще у́же у́мре. И призвав сотника, вопроси́ его, а́ще у́же у́мре. И уве́дев от сотника, даде́ тело Ио́сифови. И купив плащаницу, и сне́м Его, обви́т плащаницею, и положи́ Его во́ гроб, и́же бе́ изсе́чен от ка́мене. И привали́ камень над две́рии гро́ба. Ма́рия же Магдалы́ни, и Ма́рия Иоси́ева, зря́сте где Его полага́ху*.

Во́ время о́но, *моли́ Пилата Иосиф и́же от Аримафе́я, сы́и ученик Исусов, потае́н же страха ради июде́ска, да во́змет тело Исусово. И повеле́ Пилат. Прии́де же и Никоди́м, прише́дыи ко Исусови но́щию прежде, нося́ смеше́ние зми́рнено и алло́йно, яко литр сто́. Прия́ста же тело Исусово, и обви́ста е́ ри́зами со ароматы, я́коже обычай есть июде́ом погреба́ти. Бе́ же на месте иде́же распя́тся, верт, и в ве́рте гроб нов, в нем же николи́ же никто же положе́н бе́. Ту́ у́бо пятка́ ради июде́йска, я́ко близ бя́ше гроб, положи́ста Исуса*.

*Во у́трии же день и́же есть по пятце́, собра́шася архиере́е и фарисе́е к Пилату глаголюще, го́споди, помяну́хом, я́ко льстец о́н рече́ еще́ сы́и жив, по трие́х днех воста́ну. Повели у́бо утверди́ти гроб, до тре́тияго дне́. Да не ка́ко прише́дше ученицы́ Его, но́щию укра́дут Его, и реку́т лю́дем, воста́ от мертвых. И будет последняя лесть, го́рша пе́рвыя. Рече́ же им Пилат, и́мате кустоди́ю иди́те утвердите я́коже ве́сте. Они же ше́дше, утверди́ша гроб, зна́менавше камень с кустоди́ею*.