Канон святой блаженной княгине Ольге

Русская вера, 2017

Являясь мудрой устроительницей своего земного царства, святая равноапостольная княгиня Ольга сумела обрести и спасительную стезю, ведущую в Небесное Царствие. Будем поэтому молиться святой Ольге, чтобы она молитвенно ходатайствовала пред Господом о ниспослании Его помощи нам и нашим ближним в познавании путей ко спасению и следовании по ним. Память св. блаженной княгине Ольге 11 июля (24 июля по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 1-й

Крилома богоразумия вперивши свой ум, возлетела еси превыше видимыя твари, взыскающи Бога и Творца всяческим. И Того обретши, паки порожение крещением прияла еси. И древа животнаго креста Христова наслаждьшися, нетленна во веки пребываеши, Ольго присно славная. (Дважды).

Слава, и ныне. Богородичен. Гавриилу провещавшу Ти Дево, еже радуися. И со гласом воплощашеся всех Владыка, в Тебе святем киоте, яко же рече праведныи Давыд. Явися пространнейши небес, поносивши Зиждителя Своего. Слава всельшемуся в Тя. Слава прошедшему ис Тебе. Слава свободившему нас рожеством Своим.
 

КАНОН, глас 5-й
 

Песнь 1. Ирмос

Величаваго фараона в мори потопивша со оружием, и всадники, Израиля же преславно спасша. И по суху проведша, поем Христа яко прославися.

Запев: Святая благоверная княгиня Ольго, моли Бога о нас (поклон).

Величие наше и похвала ты еси, Ольго богомудрая. Тобою бо идольския льсти свободихомся. Ныне молися за род и роды их же Богу привела еси, поющи Христа, яко прославися.

Запев. Величаваго диявола из Руси прогнала еси. Нечестивыя кумиры отнюд сокруши. Вся люди от беззакония свободи, мудростию научающи, пети Христа яко прославися.

Слава. Черность греховную, банею крещения отнюд отмыла еси. Христа возлюбила еси. Ему же предстоящи, молися за рабы своя, верно славящия тя.

И ныне. Богородичен. Исаия Тя жезл нарицает Пречистая. Давыд же Тя престол Господень. Аввакум же осененую гору. Купину же Тя Моисей. Мы же Тя Матерь Божию нарицаем.

Катавасия: Избави от бед рабы своя, святая благоверная княгине Ольго, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Державною рукою, и сильным словом, небо и землю сотворил еси. Юже Своею кровию искупи, Церкви Твоя о Тебе утвержается зовущи. Яко несть свята разве Тебе Господи.

Запев. Державною рукою и мудрыми словесы, и силным словом, учаше Своего Сына закону Христову. И людем возбрани нежрети идолом, Ольго преславная. В память твою ныне сошедшеся, тебе прославляем.

Запев. Ты яко пчела добру разуму далече цветущия Христовы веры взыска. И яко породныи мед крещение, в царствующем граде обретши, своему граду и людем дарова. Его же вси насыщени, горести греха отбегают.

Слава. Весь похвалныи глас, и молбу ти Ольго приносим. Тобою бо Бога познахом, Ему же ныне предстоиши, прося мира державе нашей и на поганыя победы, и душам нашим оставление грехов, поющим тя присноблаженная.

И ныне. Богородичен. Приятелище явися Девице неприкосновенному Богу. Тем Тя поют непрестанно ангельстии чини, повинующеся Владыце. Ты бо роди Слово Отчее, собезначалное без Отца. О чюдо, Святыи Дух осени Тя. Катавасия.

Седален, Глас 1-й. Крилома богоразумия вперивши свой ум, возлетела еси превыше видимыя твари, взыскающи Творца всяческим. И Того обретши, паки порожение крещением прияла еси. И древа животнаго креста Христова наслаждьшися, нетленна во веки пребываеши, Ольго преблаженная.

Слава, и ныне. Богородичен. Руце Твои божествении, ими же Зиждителя носила еси Дево Пресвятая, воплощена благостию, простерши умоли Его, избавити нас от напастей, и страстей и бед, восхваляющия любовию, и вопиющия Ти. Слава всельшемуся в Тя. Слава прошедшему из Тебе. Слава свобождьшему нас рожеством Своим.
 

Песнь 4. Ирмос

Духом Божиим очищься пророк дыхающим в нем, Аввакум божественыи, бояся глаголаше. Внегда приближатся лета, познан будеши Боже, на спасение человеком.

Запев. Дух Божии почи на тебе, яко Деворе пророчице древле. Им же просветившися, укрепляющи Владимира. Разумнаго сисару диявола низложи в сети его крещаемыми, яко и Вараком в потоце киссове прежде.

Запев. Быстри подобящися Ольго богомудрая. Сокрушеном сердцем ста молящися к Богу, избавила еси род своих людей, от оскорбления кумирьскаго, и от пленения вражия свободила еси. Христа призывающи на помощь нову.

Слава. В нарочитыи день святаго ти преставления, радостно празднуем, песнь молебную Христу возсылающе, нетленным венцем венчавшему тя Ольго богомудрая. Проси нам оставления грехов, славящим тя верно.

И ныне. Богородичен. Тя от корене Иессеова процветшую, Исаия яко же прорече. От Тебе цвет прозябе, первоначалнаго плотию ношьши, и жезл Божия Духа. Хвалим Тя яко Божию Матерь, и чистую Деву. Катавасия.
 

Песнь 5. Ирмос

Слово Божие всесильное, мир всему миру посли. И светом истинным освящая и просвещая вся, из нощи Тя славящия.

Запев. Яко голубица целомудреная, на финик добродетелей взыде. Криле священне посребрене имущи. Има же возлетевши, в райстей пищи вогнездилася еси славная Ольго.

Запев. О тебе пояше Соломон прежде, вне винограда царская маслина процвете. Ты бо святыи грезн крещением в Руси насади творящи плод покаяния. О нем же Сам Христос веселится.

Слава. Умилосердися Владыко, на новопросвещенныя люди си. Непредаждь нас в руце поганых, за множество беззаконии наших, но молитвами наставницы нашея Ольги, избави ны от всякия напасти.

И ныне. Богородичен. Кропите вси, яко же пишется облацы веселия земным. Божии бо детищь Христос, очищая мира от грехов, воплотися от Девы, и дан бысть нам. Катавасия.
 

Песнь 6. Ирмос

В Церковь Небесную святую Твою, да приидет молитва моя, вопию Ти яко Иона, из глубины сердца морскаго, от грех моих возведи мя, молютися Господи.

Запев. Ревность Святаго Духа в сердцы приемши, отеческое зловерие возненавидела еси. И Христа истиннаго Бога взыскавши, чадо свету явися. И с первенцы святых на небесех ликуеши.

Запев. Новая ученица Христова в Руси явися, обходящи грады и села, кумиры сокрушающи, и люди учащи единому Богу поклонятися. Его же моли за поющия тя, о богоблаженная Ольго, помолися за вся исчадия к Богу, мир неподвижим державе нашей испроси, и нам отпуст грехов, присно тя прославляющим.

Слава. (Повторяем стих).

И ныне. Богородичен. Познавше Тобою не изписанное Слово Божие, Сына единочадаго Вседержителева, вопием Ти земнии, радуися благословеная Богородице, упование душам нашим. Катавасия.

Слава, и ныне. Кондак, глас 4-й. Воспоем днесь Благодателя всех Бога, прославльшаго в Руси Ольгу богомудрую. И молитвами ея Христе, подаждь душам нашим грехов оставление.

Икос. Русскому языку, Псковской стране, богоизбранному от варяг, княжьскому племени, прамати наречеся Ольго. И ходящих преже во тме неразумия, всех честным украси крестом, паче же святым крещением. Им же отмывше идольскую скверну, мизинии Богу нарекохомся людие. К Нему же за вся ны яко со дерзновением молишися, подаждь грехов оставление.
 

Песнь 7. Ирмос

Пламень пещныи поработиша благочестивии отроцы. Тем свыше оброси я, готовы палимы по естеству. Но паче естества мужески пояху, благословен еси Господи на Престоле славы Царствия Твоего.

Запев. Подобно Июдифи сотворила еси, посреди кумирских телищ вшедши. Тем началника сокрушила еси, и демоночетцы посрамила еси. Вся же люди научи в чистоте вопити Христови, благословен еси Господи на Престоле славы Царствия Твоего.

Запев. Похвальными цветы, аки царьскии венец богомудрей ти главе, в память твою приносим. Юже Христос нетлением венча, Ольго досточюдная. Молися за свое стадо, избавитися от всякого зла вопиющим, благословен еси Господи на Престоле славы Царствия Твоего.

Слава. Ливанскую ли гору наречем тя, на тя бо роса небесная сниде. Или фисонскую реку, добреиша сапфира камене, честнаго Владимира имущи, им же просветися русская земля. Но молитася за ны взывающе, благословен еси Господи на Престоле славы Царствия Твоего.

И ныне. Богородичен. Кивот позлащен Тя Духом, спасшую мира, потопа разумнаго Девице спаси нас. На Тя бо надеемся, и к Тебе прибегаем, отчаянныя при пучине от грех и напастей избави вопиющия. Благословен еси Господи на Престоле славы Царствия Твоего. Катавасия.
 

Песнь 8. Ирмос

Крепцыи отроцы трие суще, силою оболкшеся тричисленыя, уловиша и победиша халдея. И дивно изменися естество. Како огнь росою прелагашеся, без туги я сохрани яко пеленами. О пролиявыи мудрость на всех делех Твоих Боже, Тя превозносим во веки.

Запев. Крепка яко львица, силою Святаго Духа оболчена, едина устремися всюду истерзати кумиры. И дивно на небеси и на земли, како жена прежде Бога познавает. Ею же исперва всему роду падение бысть. Тобою же ныне спасени поем, о пролиявыи мудрость на всех делех Твоих Блаже, Тя превозносим во веки.

Запев. Премудрость Божия прежде о тебе написала есть. Се еси добрая моя и прекрасная, и похоти женския несть в тебе. Блеск лица ти яко мира обоняние, назнаменоваше твое Ольго крещение. Иже посреде кумирския лести на тебе обоня Христос, и всех нас от смрада демонскаго, к покаянию милостию Своею привел есть.

Слава. Помяни мене госпоже Ольго, убогаго твоего раба, окраденаго от врага, и согрешившаго паче человек, и помолися Христу, подати ми прощение о всех согрешениих, яже не чювствено содеях окаянныи. Да покаянием вопию, о пролиявыи мудрость на всех делех Твоих Боже, Тя превозносим во веки.

И ныне. Богородичен. Не презри Дево Твоих раб мольбы. О Тебе бо хвалимся, Твое малое стадо мы есмы. Потщися в заступление наше, и изми ны от враг наших. Ущедри знающия Тя Матерь Божию, и Сыну Ти вопиющыя, о пролиявыи мудрость на всех делех Твоих Боже, Тя превозносим во веки. Катавасия.
 

Песнь 9. Ирмос

Из Едема изыде род наш прабабы ради Еввы. Призван же Тобою новым Адамом, нам рождьшею Христа, во дву естеству Дево чистая. Взыграся Адам прадед, яко избыв первыя клятвы. Мы же Тобою хвалящеся, яко Тебе ради Бога познахом, и Тебе величаем.

Запев с поклоном. Веселися Евво прародителнице, иже бо тя прельстив, из Едема изведе, ныне попран есть твоим исчадием. Се бо Ольга животное древо, крест Христов в Руси водрузи, им же всем верным Рай отверзеся. Мы же хвалящеся яко тоя ради Бога познахом, со Владимиром сию величаем.

Запев. Жену по естеству нарицаем тя, но паче силы женския подвижеся. Тмы своего злата истощила еси, да Христов закон и учителя приобрящеши, им же просвети землю русскую. Мы же тобою хвалящеся, яко тебе ради Бога познахом, с мученики тя величаем.

Слава. Закону наставнице чистая, и учительнице вере Христове, приими похвалу от раб недостойных. И молитву о нас сотвори к Богу, честно творящих твою память, да от напастей и бед и печалей, и лютых грехов свободимся. Еще же и мук ждущих нас избави молимтися, тебе непрестанно величающих.

И ныне. Богородичен Се церкви, се дверь. Се Божия гора святая. Се жезл, и сосуд злат. Се источник печатленен. Се Рай святыи новому Адаму. Се Престол страшныи. Се Мати Божия пречистая, Заступнице всем нам поющим Ту. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святыя благоверныя княгини Ольги, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.