Похвальное слово Антонию Сийскому - сочинение царевича Иоанна Иоанновича, сына Ивана Грозного
Монах Сийского монастыря составляет житийную повесть об Антоне Сийском.
Миниатюра из рукописи 1648 г. "Житийная повесть об Антонии Сийском"
Похвальное слово Антонию Сийскому и русским святым — одно из немногих известных в настоящее время сочинений царевича Иоанна Иоанновича, сына Ивана Грозного.
Все сочинения царевича посвящены почитанию севернорусского подвижника XVI века Антония Сийского: Служба и Житие Антония Сийского, Похвальное слово и «Исповедание», в котором царевич описывает историю создания своих произведений.
В 1579 г., спустя 23 года после преставления Антония Сийского, игумен Антониево-Сийского монастыря Питирим и ученики святого архиепископ Новгородский Александр и инок Филофей пришли в Москву и обратились к Ивану IV с просьбой о канонизации святого. «Ходоки» принесли с собой и Житие Антония Сийского, составленное годом раньше священноиноком Антониево-Сийского монастыря Ионой. Архиепископ Александр обратился за помощью к царевичу Иоанну Иоанновичу, и тот, любовию «распалаем ко святому», написал службу Антонию Сийскому, которая и была представлена вместе с Житием в редакции Ионы на церковный собор 1579 г. Через полгода царевич Иоанн Иоаннович составил новую редакцию Жития Антония Сийского, а затем Похвальное слово Антонию Сийскому и русским святым (Рыжова Е. А. Антониево-Сийский монастырь. Житие Антония Сийского: Книжные центры Русского Севера. Сыктывкар, 2000. О службе преп. Антонию Сийскому в редакции царевича Иоанна Иоанновича см.: Рамазанова Н. В. Московское царство в церковно-певческом искусстве. СПб., 2004. С. 206—221. Житие святого в переработке царевича приведено в издании: Житие Антония Сийского: Текст и словоуказатель / Под ред. А. С. Герда. СПб., 2003).
Текст Похвального слова Антонию Сийскому и русским святым публикуется по единственному известному списку 80-х гг. XVI в. из собрания РНБ, ОСРК, Ф. 1.22 (бывш. собр. графа Ф. А. Толстого, отд. III, № 31), л. 369—385 об.
_____________________________
Похвальное слово Антонию Сийскому и русским святым царевича Иоанна Иоанновича
Благослови, отче!
Слава ти, Господи, слава ти, иже нам сподобивый сие великое и неизреченное смотрение твоего таиньства в послѣднем в нашем родѣ, паче же и времена, и в лѣнивем естествѣ нашем, по пророку, реченному: «О, Господи, избави душу мою, яко нищь и убогъ есмь аз, въ скорбех пренеможе духъ мой»,[2] «предваристе стражбы очи мои, смутихся и не глаголах».[3] Помыслих дьни первыя, еже быша преже насъ в родѣ нашем и от различных странъ — ово убо на востоцѣ, ово же под востоком, ино убо к сѣверу, иная же к западу. Даже и на полунощную нашу страну луча свѣтлости восия, и коснуся сердцу русскаго великаго князя Василиа[4] Сынъ Слова Божия — яко же втораго Павла[5] проповѣдатель поставит языком, тако же и сего, имиже вѣсть судбами своими, ко граду Херсуни приводит, еже и глаголется и Корсунь,[6] тамо совершеное совершает сыну Свѣту. И яко вторый Павелъ Христа позна, тако же и сей благовѣрный и христолюбивый великий князь Василей Киевский всея Русии истиннаго же Христа Бога нашего позна, иже создавшаго всякаго человѣка от небытиа в бытие и всяческая словом сотворшая. Той убо бысть первый христианинъ в землѣ Русстѣй и всю землю Русьскую преосвященным Михаилом митрополитом[7] просвяти святым крещением, и вси вѣроваша во Единосущную Троицу и Нераздѣлную, Отца и Сына и Святаго Духа.
Радуйся, граде божественый Киеве, в немже мала искра благочестие восия!
Радуйся и ты, блаженная Олга![8]
Радуйся и ты, божественый Василие!
Радуйся и ты, божественая пещера, в нейже поживе великий Феодосий и Антоний![9]
Радуйся и ты, божественый граде Владимере!
Радуйся и ты, граде Москва!
Радуйся и ты, божественый предѣле Радонеж, иже в твоей странѣ в пустынѣ поживый святый Сергий авва,[10] постником наставникъ, иноком отець, вселенней учитель и чюдесем источник!
Радуйся и ты, божественая весь Обмора, в нейже поживе блаженный Павел![11]
Радуйся и ты, Звениграде, иже явися божественый Сава![12]
Радуйся и ты, божественая ограда великаго отца аввы Сергиа, в нейже поживе блаженный Никонъ![13]
Радуйся и ты, божественный граде Ростове, иже в тебѣ просиа божественый Авраамие![14]
Радуйся и ты, божественый граде Ярославле, в немже явися преподобьный Феодор с чады своими![15]
Радуйся и ты, божественая ограда, иже Колязина нарицается, в нейже поживе преподобный Макарий![16]
Радуйся и ты, божественый острове Соловецский, в немже пожыша преподобнии отцы Зосима и Саватѣй![17]
Радуйся, Григорий, иже божественую ограду на Пелешмѣ составльша![18]
Радуйся и ты, божественый Христа ради юроде Михаилъ, иже на Клопскѣ поживый![19]
Радуйся и ты, божественый чюдесъ источниче Варламе![20]
Радуйся и ты, божественый Сава, иже составивый обитель на рецѣ Вишерѣ![21]
Радуйся и ты, мужу желаний духовных Антоние, иже из Риму пришедый в Великий Новъ град![22]
Радуйся, Димитрие, иже на Прилуке составльшаго монастырь![23]
Радуйся и ты, блаженне Павфнотие, красота иноком, еже воздвигше монастырь пречестенъ во имя Святыя Богородица во граде Боровске![24]
Радуйся и ты, блаженне мучениче преподобне Никита,[25] иже Христа ради всю жизнь свою на столпѣ пребылъ еси!
Радуйся и ты, западная звѣзда Кириле,[26] на запади стояще и на востокъ просвещающе!
Радуйся и ты, блаженне князе Петре[27] преподобный!
Радуйтеся, блаженнии Авраамии и Ефреме, иже во градѣ Смоленскѣ провосиавше![28]
Радуйся и ты, божественый Александре, иже возгнѣздися акы птица Христа ради в пустыню, иже Свирской нарицается![29]
Радуйся и ты, Макарие, иже в пустыни Жолтиковьской поживе![30]
Радуйся и ты, Еуфимие, еже пречестенъ монастырь воздвигнувый, еже во градѣ Суздалѣ![31]
Радуйся и ты, Деонисие, иже в пустыни Глушыцской поживый![32]
Радуйся и ты, блаженне Александре, иже поживый в предѣлех Каргаполскых![33]
Радуйся и ты, Иосифе преподобне новоявленный, жытелю в предѣлех Волотцскых![34]
Радуйся и ты, досточюдне и преподобне отче нашь Антоние, иже поживый в пустыни Сейстей![35]
Радуйся всяко мѣсто и страна, и всяк град, и мѣсто, в немже святии сии пожывше!
Радуйся и ты, западная страна, острове божественый Сийскый, в немже поживе божественый отець нашь Антоние, иже всю ту страну чюдесы просвещает!
Радуйся и ты, вторая пустыня,[36] в нейже отець нашь Антоние труды показа и яко бесплотен тебе поживе!
Радуйся и ты, блаженне учениче Филофее,[37] яко тамо от отца прием нѣкое оружие на диавола, иже на тя пропя сѣть; молитвою отца твоего сих, яко паутину, раздравъ, на горнее добродѣтелей востече!
Радуйся и ты, нутренняя пустыня,[38] в нейже блаженный отець нашь Антоние пожыве, в тобѣ бо истинный врагъ тѣлу своему явися, по реченному: «Елико нутрений нашь человѣкъ разстлѣвается, толико духовный нашь человѣкъ обновляется».[39] Якоже бо Дамаскин[40] возопи: «Да ти, яко в бубнѣ, во умерщвенем телеси побѣдоносець явлюся!» И Господь глаголет во Святом своем Евангелии: «Духъ живит, плоть не ползует ничтоже».[41] И пророкъ глаголет: «Кая полза плоти моей, внегда сходити ми во истлѣние?»[42] Богословъ Григорий глаголетъ: «Что убо бо убрези, и та вся издамы Богови».[43] И Исаия возопи глаголетъ: «И расторгнете сердца ваша, а не ризы ваша!»[44] И писано бо есть: «Аще кто кому издасться, тѣм и поработится. Елико бо тѣло изнуряется и естество изнемогает любве ради Божия, толико душа, акы злато, в горниле блестится». Еще бо и сущии пребывающе на земли от великаго вжелѣниа душа любо вещныя Божие искателницы доброта желает восприяти небесному, нежели земная мудръствовати или пребывати на земли. Но поистинне то велико от Бога нам даровасе дарование, яко земля Русьская иногда лединою непокорьство бяше, нынѣжедобрѣ прозябе, и плоды къ Богу приносятся — тѣх преподобных онѣх отецъ житие, и труды, подвизи, иже в Русии, яко ластовицы-пустыннолюбцы, провосиявше и Богу угодивше.
Но что убо много имам глаголати! Не можем убо мы, землении, паче же и во грѣсѣх пребывающа, по великому свѣтилнику, всея вселенныя учителю и патриарха Коньстантина града Иоанна Златоустаго, глаголюще бо въ своей книзе ему, еже Маргарит, сказует:[45] «Ходящим нам по забралом градскым, или язвимся, или язвим. Еже есть в мирѣ пребывающим нам или опечалим кого, или сами опечалимся от нѣкоих».[46] И такыми бремены, яко желѣзы связаны, не мощно бо есть нашему уму и языку изрещы тѣх преподобных отець похваление в похвалу принести. Аще убо мочно будет морьскую глубину изчерпати, сице и возможно будет и нам тоѣ мѣры достигнути — аще ли же ни, то не возможем похвалити тѣх преподобных и богоносных отецъ наших, иже в Росийстем островѣ просиявше. Но яко бо нѣкыи хытрецы повѣдуют нам, нѣкую воду езеро имуще, еже Квикьсулъваръ нарицается. И тамо златокузнецем приходящым и ожыдающым времяни, егда обычай ему есть исходити, тогда творят около езера того нѣкии художества скважни, и егда распалится, тогда наполняются тѣ оны скважни, и тогда приемлют ту воду художества своего. А не все езеро изчерпают, иже невозможно суть им и неудобно всего изчерпати.[47] Сице и нам тѣх преподобных отець увясти похвалами, акы цвѣты, — но елико возможно суть нам, яко капля дождевная, — тѣх мало нѣчто похвалити, существеного же достигнути не можем, ихже сам вѣнцодавець трудоположникъ Христос вѣнцы вѣнчя, ихже аггели похвалиша, и бѣси устрашишася, и человѣцы удивишася. Превыше бо есть человеческаго естества презимается, толико убо показався храборства и крѣпость на невидимаго врага, яко да до конца истниша его. И аще что принесем похвалу святому, ничтоже можем достойно сотворити противу труду их. Легкы бо суть нашы разумы, и Божия немощная крѣпчайши человеческаго мощнаго, немощная ли избра Богъ мира, да посрамит крѣпкая и мощная мирови — «где прѣмудръ, гдѣ книжник, гдѣ совопросникъ вѣка сего».[48]
Пророкъ рече: «Да не хвалится премудрый премудростию своею».[49] Паче же и аз не похвалюся о сем, яко премудростию списах, вѣдый своя недостоиньства, яко грубичанъ есмь и неразумен пред Богом и пред всѣми людми. Не вѣм убо, как преполових препокоение Слово, обаче благодать Святаго Духа немощное человеческое естество исправляющи и наставляющи. Хвалю, благословлю, поклоняюся Господеви, пою и превозношу имя его святое, вразумивъшаго мя, и укрѣпившаго мя, и наставльшаго мя. Вы же, господие, и отцы, и братие, друзи и сродницы, Господа ради моление вам предлагаем, прошение представляя о моем невѣжстве. Аще будет в котором слове есми прегрѣшил или прописал, или хулу на святаго возложыл неразумием и малоумием своим, и вы Господа ради собою исправливайте малое недостаточьство, по апостолу, глаголющему: «Другъ другу тяготы носите».[50] Тако и вы своим разумом мое недостаточьство исполняйте, а за мене, недостойнаго, молбы и моление ко Господу Богу сотворите и къ Пречистой его Богоматери и ко всѣм святым, паче же и ко отцу Антонию, еже не разсудих ума своего немощы и дерзнух на таковое великое дѣло, яже преписати житие преподобнаго отца нашего аввы Антониа. Но дасть ми Богъ оставление грѣхов вашими святыми молитвами. Аз, вседерзый и окаянный, дерзнух преписати о житии преподобнаго и о преставлении его лѣт 79, еже и ново слышах от чюдотворныя его ракы — яко рѣка струями текущы, тако и сего преподобнаго отца чюдеса от цѣлбоносныя его ракы непрестанно исцѣление творят всѣм с вѣрою приходящым.
Но, отче блаженне Антоние, аще пренебесных обителех пребываеши, не престай моляся о мне, грѣшнем рабѣ своем Иоанне, и преиду сверѣпое море житиа нашего, и от князей под духом врагъ душъ и телесъ наших непредкновенъ, твоими молитвами окрыляем, да царя царьствующых и Господа господьствующих[51] престолу достигну, идѣже шестокрылатии и многострашная серафими трепетом и ужасом предстоятъ, и божественую его крѣпкую и непобедимую десницу всескверная и окаянная душа моя придет. Да сподобит убо Богъ твоими, отче, святыми молитвами сих прежереченных избежати и достигнути Небеснаго Царствиа, иже твою, преподобне отче, память вѣрою и любовию совершающих свѣтло от чиста душа и сердца, и еже собрателей святому житию, и сказателей, и слышателей, и послушателей, и внимателей, и ревнителей о твоем житии.
А сие написах сего ради послѣди всѣх вышеименованных, яко не подобает похвалятися ни о чем же. Пророкъ рече: «Да не хвалится богатый богатьством своим, и да не хвалится премудрый премудростию своею, и да не хвалится силный силою своею, но о сем да хвалится хваляйся, еже разумѣти Господа».[52] Сего ради и аз похвалении премудрости не похвалюся, а сие написах памяти дѣля и извѣщение, еже от кого преписася по фторое. Там убо предиреченных ни роду своего, ни имяни своего извѣстихом,[53] яко «не похвалится всяка плоть пред Богом».[54] А иже аще хто вменет наше убогое имя и прочтет сие писание и не похулит, буди имъ милость от Бога. Иже аще кто прочетчи похулит, и отпустится им грѣх сей, яко поистину, не разсудивъ своя немощы, почах писати.
Вы же, господие и братие, молите за мя, грѣшнаго, и подасть ми Богъ и оставление грѣхов вашыми святыми молитвы и святаго его престола получити, егоже убо буди нам всѣм достигнути благодатию, и щедротами, и человѣколюбием Господа Бога и Спаса нашего Исуса Христа, емуже купно слава подобает со Отцем и Сыном и с Пресвятым и Благым Духом, — всѣм имъ получити небесная царствиа со всѣми благоугодившими Богу, — паче же о царѣ и великом князе Иване Васильевиче[55] всея Русии самодръжцѣ, и о побѣдѣ на врагы, и о многолѣтнем здравии, и о утвержении скыфетра царствиа его, и о благовѣрных чадех его, и о благовѣрном царевиче Иване, о благовѣрном царевиче Феодоре.[56] И да укрѣпитъ Господь Богъ их молитвами твоими царства ихъ непредкновенно и неподвижно, и чадом его скыфетры утвердит в Русьстем царствии. Но избавит Господь Богъ твоими молитвами землю нашу Русьскую от врагъ, и волкъ христоненавидець еретик, и от всѣх звѣрей зияющых, от востока, и запада, и от сѣвера, и от юга. И да сохранит Господь Богъ, отче честный, твоими молитвами церковь свою и люди своя безо всякые враскы и скверны.[57] Но, отче блаженне Антоние, не престай и не оскудѣвай моляся и посѣщая нас в напастех наших Христу, яко да твоими молитвами сохранены будем от врагъ душевных и телесных, яко да прославится имя твое святое в Русьстей земли и во окрестных мѣстех, яко нѣсть инаго Бога, иже развѣ того, иже прославившему своя угодникы, емуже подобает всяка слава, держава, честь и поклонение со безначалным его Отцем, с Пресвятым и Благым и Животворящим его Духом во вся бесконечныя вѣкы до скончаниа вѣком! Аминь.
Комментарии
Отправить комментарий