Стоглавый Собор: Ответ о священническом и иноческом чине

ОТВЕТ О СВЯЩЕННИЧЕСКОМ И ИНОЧЕСКОМ ЧИНУ. ГЛАВА 50 

Да духовным же пастырем архимаритом и игуменом и строителем и с соборными старцы от приходящих к ним в честныя обители с верою и со страхом Божиим и желанием сердечным от иных монастырей от священническаго и иноческого чина приимати их Бога ради ничтоже от них истязающе хотящих жити в коейждо обители о Христе в братстве и во всем духовом покорении у настоятеля и в конечном послушании. И таковых приходящих с верою приимати и в братству о Христе сочетати, и покоити их, как и прочюю братию, по монастырскому чину, и смотрити пастырем жития их, и аще будут непорочны безо всякого зазору священническое и иноческое житие проходят, и таковых пастырем бречи духовне да по совету с соборными старцы и в службы монастырския посылати по их достоинству. 

А в том себе духовным пастырем ни от кого зазору не имети, что не того монастыря постриженики, ниже ропотником потакати, такоже бы всем пастырем духовным с соборными старцы всяким безчинником не попущати, но духовне наказывати и исправляти по евагнельскому словеси: “Аще согрешит к тебе брат твой и, обратився, глаголя: “Каюся”, аще и седмищи согрешит на день и седмищи, обратився, глаголя: “Каюся”, – отпусти ему. И тогда вопроси его Петр, глаголя: “Господи, доколико крат аще согрешит в мя брат мой отпущу ему, до седмь ли крат?” И глагола ему Исус: “Не глаголю ти, Петре, до седмь крат, но до седмьдесят крат седмерицею”. Сице о кающихся и обращающихся о гресех повелел Христос приимати, а необращающихся и не кающихся и паки речи Христос: “Аще согрешит к тебе брат твой, а ты шед собою и едином тем обличи его. И аще послушает тебе, то приобрел еси брата твоего. Аще ли не послушает, то пойми с собою единого или дву, да при двоих или трех свидетелех станет всяк глагол. Аще ли и тех прослушает, повежд церкви. Аще ли и церковь прослушает, буди ти якоже язычник и мытарь”. 

И того ради духовным пастырем подобает мудрым быти и вся по евангельскому словеси исполняли, и духовне разсуждати кающихся и обращающихся по евангелию и по священным правилом приимати и исправляти, а не кающихся и необращающихся, явственно безчинствующих на соблазн миру, и таковых по евангелию и по священным правилом апостольским и отеческим не токмо от церкви и от всякия святыни отлучати, но и из обителей изгоняти, дондеже обратятся и покаются. Якоже и божественный апостол Павел к Тимофею написа: “Скоро ни на кого руки не возлагай. Запрети, умоли, обличи. Согрешающаго же пред всеми обличи, да и прочий страх имут”. 

Такоже всем пастырем духовным приимати с верою и со страхом приходящих к ним православным християн на покаяние и хотящих от них сподобитися святаго ангельскаго мнишескаго образа, и в покорении и во всяком терпении и в конечном о Христе послушании обещаются по евангелию жити и скорби всякия терпети царства ради небесного. И от тех не истязовати ничтоже, но токмо сами что дадут по своей силе, то от них приимати по священным правилом. И духовным пастырем такоже с верою и сердечным желанием, паче же и со слезами, приходящих в монастыри приимати и на время жития их смотрити, и аще со всем желанием о Бозе восхотят, и тогда по их вере духовныя пастыри с Божиею помощию по преданию и по уставу святых апостол и святых отец постризают их в церкви на соборе со всею братию, разве великий немощи, и о Христе братству сочетают, и поучив о всех полезных и наказав страху Божию и преподают их духовным старцом под начало. Они же по благословению пастырскому их учат и наказуют страху Божию и всему житию и борению иноческому хранити чистоту вкупе душевную и телесную, паче же пребывати в воздержании и в покорении и в любви и в конечном о Бозе послушании к пастырю и старцу и ко всей о Христе братии, имети же себя в последних и всех менши ничтоже разсужающи, но токмо безпрестанно Бога славити, избавльшаго его от мирского жития и суеты и сподобившаго его ангельскому святому образу и житию и чину мнишескому, но токмо помнити грехи своя и плакатися со слезами, и жити с правилом и с молитвою, якоже предаст ему пастырь старец, и знати церковь Божию и келию старчю, и трапезу. 

А по келиям и из монастыря без благословения пастырского и старчя никогдаже не исходити. И тех новоначальных пострижеников пастырем по часту духовне наказывати и поучати страху Божию, чтобы слушали о всем по Бозе своих духовных отцов и старцов и пребывали бы в чистоте и в покаянии и в прочих добродетелех иноческого борения до конечного издыхания. Также духовным пастырем не токмо верных приимати на покаяние и постризати, но и неверным, хотящих крестится и ангельскому святому образу мнишескому чину сподобитися, приимати и ничтоже от них от крещения и постризания истязати по священным правилом. 

Якоже глаголет, аще который епископ или презвитер освященная продаст или отдаст, или освоит или от крещения у кого, или от покаяния или от причастия воспросит, или который игумен от чернечества воспросит селика или толика злата и сребра, еси таковии да извергнутся по священным правилом. Или коя игумения от пострижения потому же истязует, а не Бога ради постризают ниже по силе от них приемлют, таковых повелевают игуменей священная правила из монастырей изводити и в другии в монастырь под начало посылати. Да и прочий покажутся таковая не творити. Также и по всем девичим монастырем общежительным и особь сущим приходящих с верою приимати и постризати и ничтоже от них истязати по священным правилом о всех потому же, якоже предирехом.