О преставлении прп. Саватия Соловецкого из древнего Жития

Покров с изображением прп. Саватия Соловецкого, 1585 год. Вклад инокини Новодевичьего монастыря Леониды (княгини Елены) в Троицкий собор Соловецкого монастыря.

Преставился преподобный Саватий Соловецкий в 1435 году в поселении Сорока (современный Беломорск) на месте впадения реки Выг в Белое море.

О преставлении преподобного из его жития:

«…Саватие же прииде на реченое от Бога мѣсто на Выг к часовне, и радостию великою возрадовася, яко сподобися Пречестных Тайнъ причастия. И вшед в часовню, помолився на мног час, хвалу възсылая Господеви и Его Пречистѣй Матери Богородици. И отоиде в кѣльицу, затвори себѣ, и тамо молитвы безпрестани въздая Богови, готовляшеся к вѣчному шествию.

В то же время прииде нѣкый купець из Новаграда, иды в насадѣ, именем Иоаннь. И пришед из насада, вниде в часовню поклонениа ради святых иконъ — образа Господа нашего Исуса Христа и Пречистыа Его Матере и иных святых икон, обрѣтшихся тамо. И прииде в кѣлью блаженнаго Саватиа, въсхотѣ благословитися от него. Старець же отверзъ двѣри кѣлиа и приат его. Муж же той боголюбив сый, и бѣ богатство имѣя много, и рабы, и рабыня, и принесе милостыня. Старець же не въсхотѣ взяти. Купець же много молив старца, дабы что взял от руку его: одежда или пища, или сребреница. И отречеся блаженый, едино рек ему: «Аще хощеши творити милостыня, то имате требующих». И поучив его доволно о милостини, о любви и цѣломудрии, и о милосердии домочадець, и о заступлении вдовиць и сиротах, и о прочей ползи душевнѣй — и благословивъ, отпусти и́.

Иоан же отиде, зѣло скорбя о сем, яко не приятъ от него святый ничтоже, и тщету велию вмѣнив си, бѣ бо любя иноческы чинъ. Блаженый же проувидѣвъ о сем, что ради прискорбен бысть, и възва и́, глаголя: «Не скорби, чадо Иоанне, но послушай мене. Препочи на брезе до утра — и узриши благодать Божию быти хотящую. И въ утреи безтрудным плаванием отидеши в путь свой».

И по малѣм времени бысть буря велиа, и громи, и молния, и трус велик бысть в мори и в рецѣ чрез всю нощь. Иоанн же, видѣвъ пременение въздуха, и волнение морьское и рѣчное устремление, по пророчеству старца, и ужасеся зѣло: восхотѣв бо ити и не возможе. И, приимъ благословение старче, отиде в шатеръ свой и препочи в нощи ту.

Святый же беспрестани поя и моляся всю нощь, исходныа молитвы всылаа ко Владыцѣ Христу. И кадилницу въсприимъ, и фимиянъ на углие възложи, и отшед в часовню. И тамо доволно молитвовав, отиде в келью. И покадивъ святыа иконы, съвершив молитвы Господеви, и поне вмале изнеможе, и седе на обычном мѣсте келия, кадильницу же особь по странѣ себе постави. И руцѣ въздвигь горѣ, и рече: «Господи, в руцѣ Твои предаю духъ мой». И тако предасть блаженую свою душу в руцѣ Божии, и в безславии славы о Бозѣ словый славне изыде.

Утру же бывшу, въздух на тихость преложися и свѣтлость солнечная въсия. Прииде Иоаннъ в часовню поклонитися образом святых икон, и по сем къ келии приходить преподобнаго, хотя от него благословениа прияти и отити в путь свой. И сътворь молитву, и не бысть гласа. И пакы сътворивъ молитву, не бѣ гласа ни послушаниа. И бѣ толкый вь двери — и отверзошася. Он же, сотворь молитву, вниде в кѣлью — и слыша велие благовоние, а святаго сѣдяща, и ужасеся, мня его жива суща. И глагола к старцу: «Отдай же ми, отче честный, яко дерзностнѣ внидохъ к тебѣ, многою вѣрою обьдержим кь твоей святости, понеже не смѣю отити в путь свой не приим благословениа от тебе». И стояше пред святым, а отвѣта никоегоже слыша от него.

В мантии бо и куколѣ сѣдяше блаженый, и кадилница стояше въскраи его. Келия же бѣ исполнь благоуханиа неизреченаго. И приступль, рече: «Благослови, отче Саватие, к путному шествию раба своего». Та же приник и видѣв его о Господѣ скончавшася.

И стоя помышляя, в себѣ глаголаше, взирая ко образу Господня иконы: «О Владыко Господи,что сотворю? Которому разумѣнию вдамся? Аще оставлю мощи преподобнаго сего без управлениа, то боюся, Милостиве, а прикоснутися не смѣю святаго телеси его недостойныма рукама своима, да некако что бѣдно постражу за недостоинъство мое!» И помену в себѣ слово Господне, глаголюща кровоточивѣй: «Вѣра твоя спасеть тя». И дерзнув с вѣрою велиею, приступив, взять и, възложи на рамѣ свои, яко легкый ерем Христовъ, отнесе и положи посреде часовни и, лобзавь со слезами, изыде.

И в той час прииде игумен Нафанаил к чясовнѣ. Изьявил бо бяше преподобный исход свой от телесе тогда, егда комкаше от руку его Пречистых Тайн Тѣла и Крове Господа нашего Исусъ Христа! И облобызав честныя мощи со слезами, и начат въпрашати купца о преставлении святаго. Он же сказав вся извѣстно о блаженнѣм: како прииде прежде еще ему живу сущу; и о всѣх полезных богодуховных словес, яже наказая и́ учише; и о хотящем быти наказании от Господа — въздуха пременении — како прорече; и како виде его и по преставлении сѣдяще, яко жива.

Игумен же въздохнувъ из глубины сердца, рече: «Слава тебѣ, Боже, прославляющему святых своих!» И тако, съ псалмы и пѣснми, честнѣ погребоша святыя мощи преподобнаго Саватия, вдавше персть персти, месяца септеврия в 27, славяще Христа Бога.

По погребении же преподобнаго сѣдоста оба вкупѣ, Иоаннъ же и игумен, и рече игумен: «Вѣси ли, Иване, какыя благодати сподобихомься от владыкы Христа, такова свята мужа послужихом погребению?» И начатъ повѣдати ему о житии святаго на островѣ и о пришествии со острова, како единъ по морю плавание творя, и яже слыше от устъ блаженаго. Онъ же начат дивитися, глаголя: «Въистинну, господине отче, мене недостойнаго много наказа от Божественых Писании, како жити подобает православному християнину и имѣти чистоту и цѣломудрие и милость к ближнему; и како прорече ми святая уста его хотящее быти божие наказание и человеколюбие? И аще бых увѣдѣлъ честное его преставление, то никакоже бых отступил от кѣлья сея! Но и о семь благодарю всемилостиваго Бога, яко сподоби мя видети преставльшася земнаго аггела, а небеснаго человека яко жива сѣдяща, и по преставлении, отнести в часовню честныя и трудолюбныя его мощи!» И дасть игумену милостыню доволну.

И тако, чюдящеся, воздаша хвалу Богови, творящему дивная чюдеса святыми своими угодникы, «ихже око не видѣ и ухо не слыша и на сердце любострастнаго не взыде, яже уготова Богъ любящимь Его».

И разыдошася кождо восвоя, носящи яко съкровище многоцѣнно в домы своя молитвы святаго Саватиа, славяще святую Троицу: Отца и Сына и Святаго Духа, нынѣ и присно и в вѣки вѣком. Аминь».

Соловки. Никониянская церковь на месте древней в поселении Сорока. По преданию на этом месте в старинной часовне преставился преподобный Саватий Соловецкий. Фото 1916 года.

Источник