Архимандрит Спиридон Потемкин: О Святом Дусе Господе истиннем. Рукопись XVII века

Троица Новозаветная «Отечество». XVIII в.

Рукопись XVII-го столетия,

С.-Петербургской Императорской Публичной библиотеки.

Писанная

Богомудрым и Благородным Старцем

СПИРИДОНОМ ПОТЕМКИНЫМ

Бывшим из рода славных бояр Потемкиных

и Архимандритом Покровскаго монастыря

Слово, 2. О Святом Дусе Господе истиннем.

якоже речеся мечь духовный глагол Божий.

а иже похулит Дух Истинный,

сие непрощенное нечестие ни в сем веце ни в будущем.

чтый сия со вниманием мечь духовный глагол Божий.

О христолюбцы! взыщите истины. Бога ради истиннаго; взыщите Истиннаго! крови ради Христовы. взыщите Истиннаго! кого сия не подвигнет ко взысканию взыщите своего ради спасения, да не прельстимся, мощно ли кому любити Христа; отметаяйся словес Христовых; аще мощно; научите мя. аще ли же ни не отметайте, отметающиися приводят себе скорую погибель по писанию. кая уста сравняются со Христовым. испытайте писания. аще обрящите, научите мя ащели же ни не отметайтеся. кое слово сравнится Христову слову. кая богословия уподобися Христовой богословии. Аще обрящете, научите мя. ащели же ни не отметайтеся. кто свят явися не прием святыни от Истиннаго; кто явися праведен не прием правды от Истины. Един есть Истинный иже ни от кого же прият истинства, но сам по своему естеству истинный. сего ради Христос истинный Бог наш, богословствуя о равночестном и соприсносущном Ему истинном Дусе, глаголет сице; егда же приидет Утешитель, Его же Аз послю вам от Отца Дух истинный, иже от Отца исходящь. кая честь сравнится хвале сей, еже есть Дух истинный иже от Отца исходит; всякое слово похвальное приглаголуется и твари но никтоже во твари истинный есть. приимет от Истинна по достоянию кожде а не по естеству. сего ради никтоже есть истинен собою. токмо един Бог Святая Троица сиречь един есть Отец Бог истинный, и един есть Сын Бог истинный, и един Дух Святый Бог истинный. Его же аще наричеши Бога, а не приложиши истинный. то ни что же рекл еси к похвалению истинныя славы Его. аще же наречеши Его Бога, нарицается и тварь. аще наречеши царем, нарицается и тварь. аще наречеши Господем, нарицается и тварь. аще наречеши животворящим, нарицается и тварь. но никто же от сице нарицаемых истинный есть. и того ради нарицается Дух истинный. яко ни от кого же прият величества, но сам по своему естеству велик есть, и всем тварем дает живот и дыхание и движение. вся бо тем живут и движутся, сам же Той ни от кого же величества приемлет, но сам по своему естеству велик и истинен есть. того ради непорочными усты истиннаго Сына Божия нарицается Дух истинный, иже от Отца исходит, что сего наречения более на небеси и на земли. взыщите, аще обрящете научите мя. аще же ни не отметайтеся словес Христовых. страшно бо глаголет Господь. аще пребудите в словеси Моем, воистинну ученицы Мои будите и разумеете истинну. и паки; аминь, аминь глаголю вам, аще кто слово Мое соблюдет, смерти не узрит во веки. а отметающийся Мене, и не приемляй глагол Моих. имать судию слово еже глаголах то судит ему в последний день. и паки, всяк преступаяй и непребываяй во учении Христове, Бога не имать. Оле глубины погибельныя, яко преступления единаго словеси Христова не имети Бога. и сочетану быти еллином по писанию. где суть глаголющии яко святии отцы в символ истиннаго не вложиша. да скажет нам, коея ради вины не вложиша. или коим разумом. како преступили слово Господне. пророк бо пророка не послушав преступив слово Господне токмо хлеба вкусив, и воды испив, тамо идеже повеле Бог, зол явися и убиен бысть от зверя. а ратующиися с Македонием святии отцы за честь истиннаго, и в символе Истиннаго не вложити, дивно есть прочее. скажите ми отметающиися истиннаго. коея ради вины не вложиша святии отцы в символ православныя веры истиннаго. или не вероваша тако, яко Христос рече, или не ведяху о сице страшном запрещении, на отметающихся словес Христовых, или грамоте неумеяху. прочее скажите. аще же скажите, яко не вемы, то ударяетеся по лицу срама ради вашего прежде суда Христова. несть бо тяжчайшаго греха, яко похулити Духа Святаго истиннаго в символе не исповедуем то явися хула. отъемляй бо честь истиннаго, како не хулит. и не хотяй бо хвалити токмо хульник есть по словеси Господню. иже рече несть со Мною на Мя есть, и иже не собирает со Мною расточает. сего ради глаголю вам. яко всяк грех и хула отпустится человеком, а на Святаго Духа хула не отпустится человеком ни в сий век, ни в будущий. жестоко Македонию противу рожну пратися, преможе Христос со святым евангелием вся глаголы противныя. и языки велеречивыя. открывается гнев Божий на всяко нечестие и неправду человек, содержащих истинну в неправде. не первая то напасть на церковь Божию из врат адовых изниче. но Истинный глаголет яко врата адова не одолеют ей. аще бо и непрестанно враг ратует церковь Христову, реки испущает от уст своих да потопит ю но земля работает и творит повеленная. прочеее вопрошаю, как мощно бе преступити святым слово Христово. и не исповедати Истиннаго и не вложити в символ предающе его всему исполнению церковному, и исповедати яко же символ глаголет. и сице не вложивше в символ по словеси Христову истиннаго. и явитися преступником учения Христова, научите мя. аще несть мощно: то не облыгайте святых. страшно бо писание глаголет, яко будут даны зверю уста хульна глаголати на Бога и на святых Его. и отверзе змий уста своя в хулении к Богу хулити имя Его и селение Его, и живущая на небеси. и паки, ища учения от вас вопрошаю. кто в кое время приемше символ без истиннаго, и смеяше приложити истиннаго; несть бо мощно утаитися коему собору, ни времени его. ниже имени наченшаго сие. аще же ни сего весте. то аз вам скажу. кто начат изметати истиннаго от символа православныя веры, и в кое время, и кто по имени и коим разумением. хула бо сия не менши Македония. но и много больши. он бо явно хуляще Дух Святый истинный, глаголет тварь быти того. а не единосущна Отцу и Сыну. они же ныне с помраченою прелестию содержаще истинну в неправде глаголют яко веруем в Духа Святаго Господа истиннаго иже от Отца исходящаго, но несть нам мощно исповедати сице, зане костел святый Римский едино отмещет а другаго не приемлет. а мы унеяты тому повинуемся. несть бо мощно тому блудити в вере, еже он приложил мы приемлем в церковь свою. да сохранит Христос от таковаго раздора, един бо Господь, и едина вера, и едино крещение. и от избытка сердца уста глаголют по словеси Господню. в 2-й главе Откровения Богословля, глаголет бо Дух Божий. и прииде ангел с небесе, имея ключь бездны, и уже великое в руце своей, и ят змию древнюю, иже есть сатана и диявол. и связа его на тысящу лет, и в бездну вверже его. и заключи его и запечатле его над ним да не изыдет оттуду дондеже скончается 1000 лет, да не льстит народов. по скончании же 1000 лет подобает ему разрешену быти на мало время, да льстит народы. кая сила словеси Его, и что есть еже связану быти дияволу на 1000 лет да не льстит народы. и паки развязан бысть на мало время да льстит народы. Оле тайны, яко по связании сатанином явишася престоли и седящии на них, и суд дан бысть им, и прочая. по скончании же тысящи лет, искочив из бездны отторже хоботом своим третию часть звезд небесных, еже есть отступление от веры, звезд церковных. и даде власть свою и престол свой зверю пестрому. по скончании же шести сот лет, паки ухитри по действу сатанину лукавый. второе отпадение от веры звезд церковных. и паки по скончании шестидесяти лет ухитри враг третие отступление от веры звезд церковных. прочее же что по шести летех явися не вемы, а предшедшия три отступления ухитри враг поставити яко да вси отступающии от веры погибнут в непрощенном нечестии, сиречь в хулении пресвятаго и животворящаго Духа Господа истиннаго. в первом бо отступлении похулиша Дух Святый истинный, глаголя Его быти рождение от Отца и от Сына. во втором же отступлении похулиша Дух Святый истинный отвращающеся истинства Его. да не исповедан будет в символе истинный. в третием же отступлении от веры похулиша Дух Святый истинный со оболганием святаго вселенскаго собора. яко забыша святии отцы вложити в символ истиннаго и не точию сие реша. но и все вселенския соборы похулив отвергоша. и вместо их своя новоухищренныя седмосокраментов римских ввести в церковь усилуют. по совету вогнездившеся на западе, иже тогда устремитися ему развратити где благочестие есть. ведый немощь свою, яко врата адова не одолеют церкви Христовой. посылает единых предотечей с прелестными ухищрении, еже хулити Дух истинный. а других посылает воздвигнути внешнюю брань со окрестными, да убиют друг друга, да проходит мечь да развратится ум, да раздвоится совесть в людех. наипаче же во владущиих над людьми. яко да аще и ощутят благочестие от супостат вреждаемо, но не возмогут противу стати им ратным на них нахождения. губитель же рода человеча, и враг веры Христовы. ведый яко время мало имать, грех ради наших Богу попущающу. он всеми силами, и всем своим злокозненным советом усилует. абие единым стремлением отъяти у християн веру, и крещение, и священство; и егда видит яко за сие ратуются божественным писанием и не отступают. тогда абие тщится веру истинную повредити прилоги еретическими, да не познают вернии, но да прельстятся. яко же и прочии отступницы от истинны во лжу. такождеже и крещение истинной едино ведый в церкви Христовой просвещающее тщится отъяти, но не могий. ухищряет соединити с еретическими прилоги, да не познают вернии, но да прельстятся приемше проклятых крещение. подобно же и священство, егда видит от Христа в нас действуемое возложением рук Христовых на апостолы. и от тех даже до нас, без пресечения по преданию святых седми вселенских соборов весь мир просвещающаго, тщится повредити. то все приводит, да приимут вернии и да повредят истинное ложным примешением. да впадут во извержение по страшному святых отец преданию. приемый крещение или жертву еретическую сам неосвящен. ничтоже бо хощет Христос общее имети с велияром. такожде же и церковь Христова, ни мало ни велико ниже аще бы точию подвигнув что кто от еретик изветом и исправления, то все буди анафема во християнех, да не повредится истинное приобщением ересей. весть бо вселукавый страшное слово Господне мир весь осуждающее, яко Духа Святаго не может прияти. яко не видит Его. тем же горе отметающимся истиннаго. и злоковарным советом святых соборы облыгающе, невложением в символ истиннаго. Его же мир не может прияти, а святии бо за истиннаго на смерть себе предаяху. да с миром осуждени не будут. Оле небрежения мирских разумов. како не ощущают вражия злоковарнаго совета, иже поставляет вражду между евангелием и святым вселенским собором. отступницы бо от святых соборов, обтицают море и сушу. ищуще да отвратят весь мир и род християнский, от святых преданий, еже церковь святым евангелием единою верою запечатле. ризу носяще истинну исткану от вышняго богословия, и справляет и славит благочестие великое таинство. ненавидяй же истинны отвращается сам от истинны, и прочих научает отвращатися от истинны точию не явно, но еще глаголют сомненно, и прикровенно и прелестно прельщаеми. а главное уже давно деется отступление от истинны. уже бо совершенно отвратишася, и мало не равняются богоубийцом июдеом да рекут горее тех по реченному: лучше бы было им не познати истинны, нежели познавше отвратитися от Истинны. О люте миру, иже не может прияти Духа истиннаго. и не точию не приемлют но и метутся глаголя. не подобает быти глаголанну аще и веруем во истиннаго [Скрижаль лист 822]. О человече воспомяни что глаголаши, доколе терпит ти Истинный, аще бо сам веруеши во Истиннаго, то кого ради сице слагаеши; по тебе сущии откуду научатся веры, разве от символа. но ныне крещаемии како глаголют без истиннаго, идеже бо несть истинны во крещении; то кий будет. явно бо глаголет Господь, яко Духа Истиннаго мир не может прияти, яко не видит Его, ниже знает Его. иже бо не приемлет в символе Истиннаго по словеси Господню. иже несть со Мною на Мя есть, иже не собирает со Мною, расточает, тем же несть мощно рещи верую но токмо в символе не приемлю. кто сие слово приимет кроме прельщенных, тии бо друг друга тешат боящеся да не от сонмища или чести мира сего изгнани будут. а истинное верующему невозможно инако исповедати, инако веровати, инако же в символе полагати. весть бо верный реченное слово, яко открывается гнев Божий с небеси на всяко нечестие и неправду человек содержащих истинну в неправде, в хуление Духа Святаго Господа истиннаго. не имать прощения ни в сий век ни в будущий. прочее вопрошаю вы изметающих от символа истиннаго. како чают, и како ждут скончания века сего, и жизни будущаго века. и паки грядущаго со славою судити живым и мертвым, его же царствию несть конца. прежде ли ждеши чаемаго страшнаго суда Христова, или инаго чего прежде суда Христова по писанию. аще речеши, яко подобает быти прежде отступлению. посем подобает явитися сыну погибели противнику превозносящуся паче всякаго глаголемаго Бога, или чтилища. и яко сести ему в церкви Божии аки богу, и показати себе яко бога во всяких знамениих и чюдесех ложных. посем того убиет Господь наш Исус Христос духом уст своих, и упразднит явлением пришествия своего по писанию. то добре рекл еси. но сему удивляюся, яко ждеши прежде отступления, ниже ищеши и небрежеши о отступлении. неужели бысть отступление, аще уже бысть то где бысть, да не прелестию уловят нас, да не впадем в сети его. да не отступим и мы от Бога с ними. да не отвратим слухи наша от Истинны, да не уклонимся к еллинским басням по писанию. люто бо сказует последних дней отступление. яко поклонятся зверю все живущии на земли. и приимут начертание на челе и на десней руце их же имена не суть написана в книгах животных. аще же ощутити отступление по благодати Христовой где бысть; и в кое время. то помысли, како подобает отступившим от веры прочих прельщати, и от веры отводити, да с собою вовлекут в вечную погибель, многими образы, и многими образы и многими разньствы, и многими ухищрении. и многими лестьми сице, яко прельстити аще возможно и избранныя, по словеси Господню. да уготовится путь врагу хотящему весь мир прельстити, и сести ему в церкви яко богу. что есть реченное, како сести ему мощно в церкви Божией аки богу, не будет бо ему мощно сести, донележе Христос в церкви пребывает. внегда же Христос из нея изыдет. тогда он своея лести распространит, не благоволит бо Христос ничтоже общее имети с велияром донележе бо не приимет человек верен догмат лукаваго от прельщенных; никако же Христос отступит от души его, ниже той смеет прикоснутися, тамо идеже Христос живет. такожде же и книги приемшия лукавыя догматы оставляются от Христа, и противный теми действует и ратует церковь Христову. да аще и едину книжицу видит супостат в церкви неповрежденну, сиречь неприемше развращеннаго догмата, не внидет тамо, дондеже изнесена будет прельщенными. опаляетбося Истинною, еже не мощи ему внити тамо идеже Христос пребывает. но сия вся действует враг со своими угодники малыми антихристы, сиречь предотечами его. его же пришествие хощет быти по действу сатанину, еже отвести от Бога весь мир лукавыми догматы, сице яко нашими же книгами нас же обличати будут. лжуще на Христа и святое евангелие. лжуще на святых апостол, лжуще на святыя вселенския соборы, лжуще на святую соборную и апостольскую церковь. а книги их тогда, точию имя соборных святых книг содержати имут. а по истинне все лукавства исполнени будут. то бо будет дело, и ныне есть лукавых предотечей, еже истребляти от книг истинну, и влагати лжи помраченную тму. и яко же рехом, всяку святыню имать повредити. наченши от веры, и крещения и священство, и знамение честнаго креста, и честных икон благоухищреннаго начертания благоискуство. и святых книг превращение ухитрит. и нравом христианским писаных и держимых по преданию святыя соборныя церкве руганием дерзнув осмеяти вся та из книг изметающе, а своя небывалая в церкви влагающе и с еретики соединяющеся, и веру их и крещение и священство приемлюще. и теми своими делы всякаго християнства по святым правилом себе лишающих, и лукавому себе присвояющих. и сице всемирной их прелести, антихристу путь устрояющих, и мнящихся быти християне, погибают в небрежении, работающе чреву и сластем мира сего ругающеся благочестивым християном, и нехотящим приимати их лукавых нововводных и богомерских прилогов, и превратов. глаголют како можете разумети неведущи многих разных языков. ниже риторства, ни философии учащеся. ваше дело приимати то, иже мы страждущем, и нам дана власть знати в словесех силу, что приимати от божественных писаний, и что отметати, да не пременится наше предприятое, донележе вси людие будут едино стадо, под единым пастырем, прежде скончания мира. егда же рекут благочестивии, яко не знаем кроме единаго, разве истиннаго Спаса нашего, Той нам есть пастырем Начальник ныне в день века, иже есть и будет. а еже глаголете вы быти исправлению прежде скончания мира. и единому пастырю, то словесем Господа нашего Исуса Христа противне. глаголет бо Господь во святом евангелии, егда приидет Сын Человеческий обрящет ли веру на земли. и яко же бе пред потопом ядяху и пияху женяхуся, и прочая [Лк. зач. 87,88]. и егда рекут мир и утверждение тогда нападет на них всегубительство [к солун. зач. 275]. прелесть бо последняя не исправлению виновна быти глаголется. но всегубительству, и от Бога отчюждению, и к сатане присвоению, яко же глаголет писание. и поклонятся зверю вси живущии на земли, их же имена не суть написана в книгах животных, но никто же от прельщенных речет, яко прельщен есть и яко прельстихся, яко Бога похулив, яко еретическую похвалив веру аще и арианин кто будет, аще македонянин, но еще и хвалится глаголя. яко християнин есть. яко благочестив, яко величаю Бога яко Христа почитаю. яко евангелию покаряюся, и апостолам повинуюся, и святых почитаю. что сия глаголы возмогут ему в день Господень имущему в вере богохулныя догматы. единою бо проглаголав лукавый догмат и возлюбив его, все христианство похулив есть и единою похулив истиннаго и пребывает держащеся хуления, како может похвалити Истиннаго. несть бо мощно от единых уст происходити хуле и хвалению. похуливый аще и хвалит во иных Бога, не приимет Бог хвалы его по реченному. всяк имеяй в себе ересь и хуление; чюждый Христа является, и всуе Христа имеет, по реченному: не всяк глаголяй Ми Господи Господи, внидет в царство небесное. но мнози услышат не вем вас. евномиева бо ересь менши всех зрится. зане во едино погружение, точию крещают со елинны осуждаются по святым правилом. а хулники на Святый Дух где явятся непрощенным бо нечестием недугуют. и несть им части ни жребия во кресте Христове, ни во смерти Его, ни в воскресении Его. отрицающиибося перваго воскресения. како второе возрадуются. блажен бо рече и свят иже имать часть в первом воскресении. на сих бо вторая смерть не имать области, и прочая: не глаголю на каникулы, не глаголю рече мы веры еретическия не приемлем, но крещения их не отторгамся. потому что крещают во имя Отца и Сына и Святаго Духа. тако же и священства хиротонию незаглажену имут. Оле безумия омраченных, како глаголете веры не приемлем, а крещения не отвращаетеся. у него же вера зла, како крещение добро может быти. такожде и священство. аще бо рече будет в дому сын мира, то почиет на нем мир ваш. ащели же ни, то к вам возвратится глаголет Господь. и всяк епископ или презвитер приемый еретическое крещение, или жертву, абие не священ. и чюжд християнства, по правилом святых отец. апостол глаголет, едино бо есть Господь, едина вера, едино крещение. тем же несть мощно обрести другаго Бога разве единаго. аще и мнози суть глаголемии бози по апостолу. но един есть Истинный. а глаголемии ложни суть вси. такожде же и вера едина есть истинная. а глаголемии ложнии суть вси. такожде и крещение едино есть истинное. аще и мнози суть крещения глаголемая, но едино есть истинное. а глаголемии яже от еретик все крещения ложни суть и чужи християнства. тако сатана вас прельстил не знати ниже взыскати истинны. Кто Бог есть разве Единаго живущаго в Сионе. кая есть вера, разве единыя положенныя в Сионе, и кое ино крещение, разве единаго истиннаго положеннаго в Сионе, и коим разумом богословия велит нам знати едино истинное крещение, а не разньством разума. всяк бо иже не знает единаго истиннаго Бога во Святой Троицы единаго Бога, еллин есть по своему злочестию. и всяк не знаяй единыя истинныя веры яже во Святую Троицу единаго Бога, еллин есть по своему злочестию. и всяк не знаяй единаго крещения, еже есть во имя Отца и Сына и Святаго Духа во едино Божество, а не в ересь не во Ариево злочестие, ни в Македониево злочестие в вере, чужд християнства. како может благочествовати в крещении. како снидет Просветитель. како послужит вода рукам вражиим. всяк бо зловерный враг есть стихиям. аще и повинул есть Господь суете тварь неволею, воздыхает и болезнует, чающе свобождения, да не работает врагом Божиим по писанию. истинным же точию другом Христовым истинно во Святую Троицу крещающим с радостию работает тварь. ащели же кий любо буди от еретик крещает глаголя во имя Отца и Сына и Святаго Духа. не верует яко Святая Троица есть Отец и Сын и Святый Дух. Бог един есть и равночестен и единосущен и сопрестолен, а не два ниже три бози яко блядословят еретицы, ариане, и македониане, и прочии. или яко новыя македониане непрощенным нечестием недугующе хулницы Святаго Духа Господа истиннаго. к таковых действу не снидет благодать, но добре глаголют святых отец правила. яко еретическое крещение несть крещение, но осквернение. и помоливыйся с еретики чюжд будет христианства. помоливыйся бо с еретики свою молитву глаголя, а не еретическую. но понеже тех молитвам приобщил есть свою молитву, и того ради отвращается Бог не точию молитвы но и християнства его, множае паче гневит Бога крещение от еретик, яко еретицы суть крещающии во злую свою веру, крестят хуляще Бога во Святой Троицы единаго. какова их есть вера мерска Богу, тако бо и крещение, нань же никогда же призрит Бог, ниже действует но яко же еллинов и июдеов отвращается Бог. такожде и священство, но мерзость запустения видяй бо враг разнословия погибель человеческую равно есть что еже от церкви отпасти и в ересь уклонитися. сице и от еретик что приемшему чюжду быти христианства не могий кого привести к себе в ересь, какову любо буди, то сам глаголет приими мя с моею ересию. и злоковарным советом. ухищряет слово яко крещенный от еретик некрещен есть, и освященный неосвящен есть. и теми злобами двема злоковарно настоит, истребити истинное крещение, и истинное священство. да лестию введет в злочестие, и ухитрити свою мерзость запустения по писанию. но горе приемлющим от злоковарных крещение, или священство. и лучше бы им не родитися, сиречь умрети во утробе матерни. прочее умолчю нежели соблазнити сим единаго от человек. а иже глаголют яко римляне яко не суть прокляти, не бе бо тогда их ереси. егда святыя соборы еретик проклинаху. да ведят вси таковии, яко римляне отступили от веры в последняя времена. близ пришествия антихристова, и кая ересь той ереси сравнится в злобе. зане вся ереси прежде бывшия ухитрил враг, да отведет от Бога верных християн в злочестие бесовы, а не сам собою, бе бо связан тогда да не льстит народов дондеже скончается 1000 лет. по скончании же 1000 лет развязан есть по писанию на мало время, да льстит паки народы. и абие искочив из бездны, отторже хоботом своим папежем римским третию часть звезд церковных. и поверже их на землю, сиречь под ноги своя, еже владети ими сице преждебывшия ереси привлачит к римской яко всем повинутися той во свое время, и быти всех ересей приятелищу невозбранну и приимати всяку ересь не истязуя крещение ни священства. токмо единаго соединения сиречь унии с римским костелом, иже есть дщерь в Вавилоне, и град сам, седящая на звери червленном, пияна кровию святых по писанию, на мало время отступление от веры в веце сем ко идолослужению и ересем. но та вся проповеданна и обличаема беяху святыми пророки. римская же прелесть отступление самем Духом Святым Господем истинным явственно проповедана всему миру. и святаго апостола Павла глаголюща сице; яко Дух явственно глаголет. яко в последняя времена отступят нецыи от веры, внемлюще духовом льстивым и учением бесовским, от истинны слух отвратят и басням уклонятися, и во умножении льстивых словес вас уловят, и прочая. тем же римское отступление и в последняя времена збывшееся, мерзейше есть Богу всех отступления прежде бывших. зане приятелище бысть всем ересем, и всем нечистотам по действу сатанину, их же приемлюще и с теми соединяющеся является ныне всех ересей источник и бездна прелести. А еже глаголют подобницы. яко не суть прокляти римляне. аще и еретицы суть, но сии глаголют не ведуще писания, ни силы Божия в них. и вся бо ереси хулят Святаго Духа явно, и без прикровения, яже мощно ощутити многим и отвратитися. А сии помраченною прелестию врази суще наши, подражают нас, присвояюще благочестивых нарицают раба быти Духа Святаго Отцу и Сыну, но исхождению Того глаголют быти от Отца, и Сына блядословят хулно. еже бо исходити Тому от Отца и Сына рабско есть. и под временем а не единосущна Отцу, еже глаголют явно хулницы суть на Святый Дух. и явно преступницы по свидетельству Сына Божия глаголюща: Дух истинный иже от Отца исходит. римляном же приемше совет лукав еже хулити Дух истинный и прилагати и от Сына. нужда им настоит от того же лукаваго совета. еже не нарицати Истиннаго, никто же бо есть Господь истинный, токмо един Творец всех тварей видимых и невидимых. яко выше рехом, хулницы не ощущают своея погибели, ни прелести вражия, дерзают противитися словесем истиннаго Бога и Спаса нашего Исуса Христа. и аще нарицают Того Бога истиннаго а небрежением Христовых словес жидове являются, а не христиане. иже бо аще разорит едину заповедей сих малых, разорит его Господь и мний наречется во царствии небеснем, сиречь тамо мучен будет, идеже будет сатана и кланяющиися ему, осуждением мучими. и се есть мний наречется во царствии небеснем. тем же аще за малую заповедь сице страшно осуждает Господь. то коими за страшную и великую заповедь, наипаче же свидетельство Господа нашего Исуса Христа. о Святом истинном Дусе иже от Отца исходит, не смей приложити и от Сына, обоя суть сия хуления на Святый Дух и непрощенное нечестие по словеси Господню. видиши ли страшное прещение, ни ли вострепещиши всеми уды своими, яко уне есть небу и земли превратитися, нежели слову Христову пременну быти, или не приемлему быти. небо рече и земля мимо идет. словеса же Моя не мимо идут. и отметаяйся Мене, и не приемляй глагол Моих имать судию слово, еже глаголах то судит ему в последний день, коего собора хощеши, или хощеши коего суда, ищеши на римское отступление указания, или не видиши яко сам Господь прежде всех святых соборов, и прежде тех отступления осудил их есть. и непрощенным нечестием удавишася преступающе словеса Господня. страшная. кая ересь дерзнула, сице востати на отметание словес Христовых. разве римская. вси бо еретики не смеяху отвращати словес Христовых. но толкованием развращенным смущающеся погибоша. римляне же явная словеса Христова отвергоша, и отвратишася еже есть Дух истинный, иже от Отца исходит, в самом главнейшем спасении, еже есть Дух истинный. отвергошася словеси Христова, а самой главнейшей погибели еретической еже и от Сына себе положиша. к сему что речем, разве прилагающим приложит Господь язвы по писаниих. а отъемлющих отъемлет Бог часть их от книг животных. в последняя бо времена последних прелестей несть мощно обличити. кроме святаго евангелия и святых апостольских словес, и сие самого токмо сущесловия, а толкования вся развращенна суть. и того ради Господь [Лк. зач. 87] бегающим в последнее время от прелести, назад неоглядываяся велит бежати, поминающе жену Лотову. егда же Того вопросиша апостоли глаголюще, где Господи. он же рече, идеже будет труп, сиречь святое евангелие, тамо соберутся и орли. о своих бо словесех Господь страшно заповедует глаголя: небо и земля мимо идут, словеса же Моя не мимо идут. и паки, не приемляй словес Моих, имать слово еже глаголах. то слово судит ему в последний день. яко Аз о себе не глаголах, но Отец посла Мя Той Мне заповедь даде. что реку и что возглаголю, всяк преступаяй учение Христово, Бога не имать по писанию. Зде зрите отступления рачители, в киих винах обретостеся. отметающеся словес Христовых, еже есть Дух истинный, иже от Отца исходит, не мози отметати Истиннаго, не мози приложити и от Сына, не отпуститбося сие нечестие, ни в сей век, ни в будущий, по словеси Господню. июдеи бо вероваху пророком приносящим заповедь от Бога Отца. нам же не пророком, но сам Сын Слово Отчее. прием от Отца заповедь, что речет к вам, и что возглаголет. страшно запрещает нам да не отметаемся реченных ниже да прилагаем умолченных, да не з жидами часть приимем. дерзающим отметати или приложити к слову Господню судит им Бог. аще бо рече пребудите в словеси Моем, воистинну ученицы Мои будите. и разуместе истинну, истинна свободит вас. тем же несть мощно быти ученику, и не разумети истину не пребывающему во словесех Господа нашего Исуса Христа.

Ему же слава со Отцем и со Святым Духом ныне и присно и во веки веком,

Аминь.

Источник