Архимандрит Спиридон Потемкин: Об аллилуйи

Рукопись XVII-го столетия,

С.-Петербургской Императорской Публичной библиотеки.

Писанная

Богомудрым и Благородным Старцем

СПИРИДОНОМ ПОТЕМКИНЫМ

Бывшим из рода славных бояр Потемкиных

и Архимандритом Покровскаго монастыря

Слово 9. О еже соедини Господь земная с небесными, и совокупи вся языки человеческия, и устрои пети славу святыя Троицы языки человеческими купно со ангельскими, глаголя аллилуия.

Велия тайна благочестия. Бог явися по плоти. оправдася в Дусе. показася ангелом, проповедан бысть во языцех, веровася в мире, вознесеся во славе. Дух явственно глаголет, яко в последняя времена отступят нецыи от веры, внемлюще духовом лесчим и учением бесовским. глаголет сосуд Христов Павел, и паки се тайну вам глаголю, вси бо не успнем, вси изменимся. тако скоро яко во мгновении ока, в последней трубе. аще кто християнин да услышит реченное от Павла, и да разумеет величество таин сих. еже бо рече, яко Бог явися во плоти, есть вера християнска. а еже изменимся во мгновении ока, се воскресение мертвым. аз же глаголю. понеже сия велия тайна содержит собою начаток и конец, всего християнства в веце сем: почто нерадеша о них римляне; сочиняюще седмочисленныя костельныя тайны, тех они в седмочисление не прияша. а яже сами собою нарекоша тайны, сия предают. крепка держима бе быти во отступлениих от веры. о сем чтый да разумеет, чесо ради сие творят. отступльшим бо от веры несть мощно доброхотствовати церкви Христовой, внемлют бо бесовским учениям, еже всегда гонити и разрушати догматы святыя в церкви Божией. и негде же бо не будет им мощно похулити Бога отъятием славы Его, тамо тщится приложением. ведуще реченное от Господа, яко славы Моея иному не дам, и яко грядет мира сего князь, и во Мне ничтоже имать. аще бо и мало что повредят в догматех пения; того всего догмата единаго ради слова отъятого, или приложеннаго или премененнаго отвращается Бог. и того ради глаголет церковь Христова усты великих светилник, Павла же и Златоуста, яко аще бы и ангел с небеси глаголал вам паче глаголанных, анафема да будет. отвергошася седмочисленнаго православия святых вселенских соборов, на них же действова Агнец Божий Христос, разрешая седмочисленное святых печатей да созиждет церковь свою, и да исполнит ю святых своих соборных догматов, да открыет в ней неизреченное и от века утаенное святым ангелом не ведомое таинство. в ня же желают ангели проникнути по писанию, да скажется седмию святых соборов началом и властем небесным церковию многоразличная премудрость Божия, по предложению се. и тогда явися Агнец Божий во славе своей: седмь очей знаменуя. яко аще кто дерзнет от святых седмочисленных соборных преданий отъяти что, или приложити, или пременити, или аще что худое подвигнути по писанию. не точию анафема, но и главы Агничии касатися, ищет болезнено. того бо ради Сын Вышняго от велелепныя славы сниде на землю. и бысть человек, и пострада за человека плотию, и умре за человека смертию на кресте. и тако утаившися от мучителя диявола, яко сие страждет неизреченнаго ради человеколюбия. и тако во ад сниде и узы окованных разреши, и самого диявола связа на тысящу лет, да не простирает прелести до времени дондеже скончается 1000 лет. и тако поемши за руку Адама рече сущим из Адама, внидите паки в рай. и тако воскрес из мертвых, яви неизреченное свое человеколюбие ко человеческому естеству. яко вознес на небеса человечество, посади его одесную Отца, и устрой его поклонятися пред ним всякому колену небесных и земных и преисподних и еже не бе прежде рожества Христова. сие Христос устрой быти, яко же бо вовремя рожества Христова воспеша ангели, слава в вышних Богу, и на земли мир. тако и во время воскресения своего, устроил Господь пети в церкви своей, воскресение Твое Христе Спасе. ангели поют на небеси, и нас на земли сподоби чистыми сердцы, Тебе славити. и сице совокупи и соедини Господь земную церковь со небесною. яко несть мощно ни земной церкви славити Бога без небесной, ниже небесной без земной. вся бо яже на небесех поют силы небесныя, сия и таже поет на земли церковь. и яже предаде Господь на земли святыми соборы. сия вся устрой пети на небесех, яко едиными усты и единым сердцем небесным и земным славити и воспевати пречестное и великолепое имя Твое Святыя Троицы Отца и Сына и Святаго Духа глаголя. свят свят свят Господь Саваоф исполнь небо и землю славы Его. зри зде со вниманием аще хощеши разумети, яко разум песни сея о Господе Саваофе простирается мнящеся ко иному лицу. его же аще не увеси от коего лица, или к коему лицу, ино бо есть еже лик небесный поет, а ино собор святых небесных, и кая сила тех и кто сказа в церкви о сих разньствах. то ни Господа, ни Саваофа, ниже исполнивша небо и землю разумети можеши. такова бо суть небесныя тайны, их же утаил есть Господь от премудрых и разумных и открывает та младенцем по словеси Господню. Подобне же утаися разум истинный, от многих человек во христианех о трикратной аллилуии юже пояху силы небесныя до пришествия Сына Божия в плоть, в славу и честь триипостаснаго Божества, глаголя: аллилуия аллилуия, ангельским языком. а человеческим языком, сия по всей вселенной истолкова Господь в церкви, слава Тебе Боже. егда омыл есть Господь церковь святую своею кровию, и омывши, сице возлюбил, и сице почтил. яко в равное ликование со святыми ангелы славу Святыя Троицы устроил, а славе Ея всем небесным силам поклонятися повеле: и святыя аллилуия 2-жды ангельским языком, а третие человеческим пети устроил есть. слава Тебе Боже, и понеже псалом глаголет, хвалите Господа вси языцы, и похвалите Господа вси людие. и того ради почтил есть Господь вся языки дополнением небесныя славы, яко всем языком пети троичную славу, купно со святыми ангелы, глаголя. аллилуия аллилуия слава Тебе Боже: яко да вси ангели купно со человеки, а человецы купно со ангелы неразлучно поют во славу Святыя Троицы, святая аллилуия. А еже совокуплятися гласовом купно с человеческими. и тако приносится от ангел и от человек ко Святой Троице святым аллилуием. сему служат святии ангели начаток духа имущи. иже воздыхают и болезнуют чающе скораго скончания века сего, чтый да разумеет, аще хощет не глумления бо ради положи во церкви святой аллилуия пети человеком со ангелы. и ангелом купно со человеки, того бо ради Сын Божий еже о нас совершив смотрение, и еже на земли соединив с небесными, яко да едиными усты и единым сердцем славится пречестное и великолепое имя Пресвятыя Троицы Отца и Сына и Святаго Духа, яко же поется во время божественныя литоргии. ангелом ту сущим и невидимо дароносящим, и служебне предстоящим глаголет священник сия словеса, даждь нам единеми усты, и прочее. и того ради устрой Господь пети в церкви аллилуия, глас языка человеческаго со ангельскими, во славу Святыя Троицы, аллилуия аллилуия слава Тебе Боже. и тако устрой певаемой быти аллилуия всеми языки, яже суть под небесем, аллилуия аллилуия слава Тебе Боже. нашим языком российским. А греческим устрой Господь, аллилуия аллилуия гдокса сифеос. а римским и латынским. аллилуия аллилуия глорияти бидиос. и тако всеми языки пети устрой Бог святую аллилуию. А еже ныне в последняя времена, егда нужда налагает лестию сатана, еже отступати от веры, и от истиннаго Христа Бога нашего Сына Божия отвращатися. и ко антихристу сыну погибели обращатися людем, и славу Божию к лицу сына погибели обращати по действу сатанину, тогда начинают пети аллилуия четверицею, сиречь трижды аллилуия, а четвертое слава Тебе Боже. а вопрошающим отвещают лесть сокрывающе глаголя: яко три краты глаголем аллилуия по трем лицем Божества, а четвертое слава Тебе Боже. ко всему Божеству. а небрегуще о прелести сына погибели. мы же к таковым глаголем, убойтеся Бога, како четверицу почитати нудитеся. Святая бо Троица Бог наш, славы своея иному не даст, ни чюжия приимет. и яко же бо Отец имеет и содержит все совершенное Божество. тако и Сын и Дух Святый имать и содержит все исполнение Божества. и еже сия богословия о Святой Троицы истинна есть, то нужда вам надлежит стыдетися вашея четверицы. Троица бо Святая, Бог наш не имать четвертаго лица сице чюжия не приемлет славы. яко не прият чюжаго огня в пустыни, но и приносящих погубил есть. тако будет всем приносящим чюждая Богу, а не Божия. Зде да слышит всякая главня адова, дерзающая вносити небывалая в церковь Божию. како смееши глаголати, яко Бог Отец, не все Божество. Бог Дух Святый, не все Божество: но четвертое слово прилагаеши всему Божеству и егда бо молишися, такожде и Сыну, егда молишися не всему ли Божеству молишися, тако и Святому Духу. каяждо бо ипостась во святой Троице есть всесовершенное Божество. а скудость во твоей скудости умной души является, а не в Бозе. ты бо еси слово четвертое приносити неведомому и незнаемому Богу мудруеши: не веруеши во Святую Троицу Единаго Бога, и не веруюши яко пришел есть Христос Сын Вышняго един от Святыя Троицы. яко соединил есть земная с небесными, яко уневестил есть себе земную церковь и яко представил царицу одесную себе в ризах позлащенных одеянну и преиспещренну. что есть позлащенная; разве святыя божественныя догматы в церкви: ты же разсмотри, мощно ли ти есть одеянной царице прилепити или пришити что от онучь твоих, не вся ли цветы тоя или утварь свою от Господа преданную, се цело содержаще. ничего от рубищей твоих не приимет; наипаче же четвертаго вашего аллилуия, тогда не подобает глаголати слава Тебе Боже. и аще бы подобало трижды рещи аллилуия языком человеческим, то бы рещи трижды слава Тебе Боже, а четвертое ваше где потребно будет. туне ли Христос умре, туне ли соединив земная с небесными. туне ли устрой церковь земную с небесными, туне ли повеле пети ангелом и человеком, яко единеми усты трисвятую песнь глаголя: свят свят свят Господь Саваоф, исполнь небо и землю славы Его, почто не прилагает четвертаго свят. яко суемудрствуете ко всему Божеству подобящеся вашему четвертому аллилуия. вем бо аз коегождо лице, во Святой Троице имать все. и все совершенное Божества. аз же паки вам суемудренным глаголю. яко не весте от коего лица поется песнь сия. еже свят свят свят Господь Саваоф, и прочее. и к коему лицу простирается, еже бо аллилуия, сие к Божию лицу простирается слава Тебе Боже. свят свят свят, сего не весте ниже знаете. аще бы есте ведали, то бы есте аллилуия не четверили: но знали бы есте вышнии Иеросалим, иже есть мати всех нас по апостолу. но понеже вашего ради частнаго пиянства, вам попусти Бог поглощати и последнюю вашу мудрость по писанию. и яко же бо хулником на Святый Дух не оставится ни в сий век ни в будущий: тако будет и четвертое лице славящим незнаемое. на сие бо нечестие открывается гнев Божий по писанию. но понеже о сих писа апостол Христов Павел. из него же вы испытаете глаголя, яко Павел неродившеся в Риме глаголет. аз в нем и родихся. и ложь на Павла блядословите. того ради Павел избранный сосуд есть Христов, еже лгати ему. того ли ради восхищен бе до третьяго небеси. того ли ради глаголет нам, яко не ктому живу аз, но живет во мне Христос, еже лгати, ему же не буди то. Павлова бо уста, Христова уста. но понеже не веруете и Христовым устом. иже есть царь и Господь Павлов, но ищете нань ложных словес. во еже неправду поставити нань: таково и держите языки ваша лжуще на Павла Христова апостола, и не солга бо той, яко в Риме родился есть, аще и в Тарсе киликийстем рожден есть Павел, но и в Риме всячески родился есть купне. а еже како в Тарсе, и в Риме купно родися, сего разума вы не весте. ниже знаете. и сего ради лжите на Христа, лжите на Павла, и на всех Христовых апостол лжите, и на всех святых отец. яко еже рече не рекоша в символе истиннаго. то бо дело есть лукаваго сатаны и отца вашего диявола, еже лгати. варварин бо тысящник хотяй мучити Павла известно уведав яко римлянин есть, целомудреннейше явися паче всех вас. вы же зря не видите, како не солга Павел. яко в Риме родился есть. но сие от многих вас утаил есть Бог. яко сие слово еже глаголет Павел, яко открывается гнев Божий с небеси на всяко нечестие, и неправду человек содержащих истинну в неправде. что сие слово разумеете ли; како содержите истину в неправде; но аще бы бысте четвертаго аллилуия ко троичной славе, и не содержали бысте. сия истина в неправде вашей, и не глаголали бысть яко веруем во истиннаго, но в символе не глаголем истиннаго. что сие слово; разве содержите истинну в неправде вашей. како можете веровати во истиннаго не имуще в символе истиннаго. чадо бо ваша откуду научаются вере, от символа, и того ради да убиваете их вечною смертию, содержите сию истинну в неправде. последующе учению лукавому, или еже истребили есть литеру аз из святаго символа. идеже бо стояла рожденна а не сотворена единосущна. тамо бы отъемше литеру аз истребивше и учинисте рожденна несотворена. и тою единою литерою убили есте весь мир. и не знаете како содержите истинну в неправде вашей, и страшно бо есть святой богословии, и не знаете от чего погибаете. не туне бо сатана наустил истребити от святаго символа литеру сию, но да устроит по действу своему еже быти от християн жидов, и поставили то яко еще не сотвори сего Бог, еже рожденну быти Ему доныне. и того ради литеру аз друг их Арий, глаголя. Бога истиннаго рожденна и несотворенна быти Сына Божия. и того ради Дух Святый на соборе устроил в символе глаголати рожденна а не сотворенна, и прочая. а не тако яко Арий блядословит. ныне же еще мудрование лукавое, и Ария друга своего оправдают. и Христа иже нерожденна, сиречь рожденну быти несотворенна устроиша глаголати. и того ради литеру аз из символа истребивше глаголют рожденна еще несотворенна. а еже сие еще не явно, но таящеся жидовстуют. то не явно боятбося еще да не камением от християн побиени будут. во уме же у них есть всесовершенное имуще жидовство. свидетельствует книга их Скрижаль, на листе 21. да разумеет аще хощет; никогдаже сицевой прелести быти. попусти Бог, тако ныне в последняя времена. ныне же сатана устроящаго человека подошвы выпорет. и единою литерою убивает лукаво по писанию, не точию словом единым еже есть четвертое аллилуия глаголати слава Тебе Боже. Троица Святая Бог един есть, и не приимет чюжия славы, яко чюжаго огня. сиречь и Надав бо и Авиуд, не инаго Бога творение огнь Богу принесоша, но понеже не в лепоту сия сотвориша, отверже Господь и не прият. и чюжия нарекл, и принесших во огни погубил. еже есть все быти в научение наше. не мози приложити, не мози отъяти, яже Богу устроившу. а еже суемудренно нарицают прилогом в символе истиннаго, в том им судит Бог. не по нашему бо святии отцы боялися преступити слово, или учение Христово, яко ныне творят нецыи. не точию яко хотят держати, но и держащих преданныя Богом истинным, как зубами не искусают. а святии отцы на втором соборе во истинну Духа Святаго Господа Истиннаго положиша: и смеющих отъяти что, или приложити анафеме предаша: но понеже хуление на Святый Дух не имать прощения ни в сем веце ни в будущем. того ради сатана часто на хуление Святаго Духа, своя ему сосуды устрояет, и многажды мнимых духовных людей. но духа неимущих. наущая брань творити, к церкви воспаляя сие непрощенное нечестие всесквернаго Македония. а не могуще противу словес Христовых стати, тщится воспалити гнев Божий на люди, еже содержати людем истинну в неправде, еже глаголати веруем во истиннаго, но в символе не хощем глаголати истиннаго: аще и Христос речет, но отцы не рекоша. кто сему словеси адскому поверит, разве главня геенскаго огня. ты же смотри христолюбче воспоминая глаголанная зде, како сатана вооружается на церковь, еже повредити в ней веру святую и крещение святое и священство святое, и вражду положити между Богом и святыми Его, еже лгати на святых яко ничесоже истиннаго обретается, внимай тщателно, како врагов единым замахом убивает сугубо, сиречь и хулением на Святый Дух, и враждою между Богом и святыми Его. преступление словес учения Христова. яко глаголет Богослов, всяк преступаяй, и непребываяй во учении Христове, Бога не имать. мощно ли святым было преступити слово сие Христово. прииди в чювство человече. аще еще не жидовин сый, и не облыгай святых невложением в символ истиннаго. лучше бо было всем умрети святым за истиннаго. нежели преступивше слово учения Христова, и не вложити в символ святыя веры истиннаго, где есть слышали сие слово прежде Скрижали вашея, кто и когда бо смел рещи лжу сию на святых Божиих, разве ныне вы. но Господь Истинный отсмеется вам в день лют, воньже не чаете. Богу нашему слава всегда ныне и присно и вовеки веком, аминь.

Источник