Стоглавый Собор: О живописцах и честных иконах

СОБОРНЫЙ ОТВЕТ О ЖИВОПИСЦЕХ И О ЧЕСТНЫХ ИКОНАХ. ГЛАВА 43.

 

Да во царствующем же граде Москве и по всем градом по царскому совету митрополиту и архиепископом и епископом бречи о многоразличных церковных чинех, паче же о святых иконах и о живописцех и о прочих чинех церковных по священным правилом, и каким подобает живописцем быти и тщание имети о начертании плотскаго воображения Господа Бога и Спаса нашего Исуса Христа и Пречистыя Его Матери и Небесных сил и всех святых, иже от века Богови угодивших. 

Подобает быти живописцу смирену, кротку, благоговейну, непразднословцу, несмехотворцу, несварливу, независтливу, непьяницы, неграбежнику, неубийцы. Наипаче же хранити чистоту душевную и телесную со всяцем опасением, не могущим же до конца тако пребыти по закону женитися и браком сочетатися, и приходити ко отцем духовным начасте и во всем извещатися и по их наказанию и учению жити в посте и в молитве, и воздержании, со смиренномудрием, и кроме всякого зазора и безчинства, и с превеликим тщанием писали образ господа нашего Исуса Христа и Пречистыя Его Богоматери, и святых пророк и апостол, и священномученик и святых мучениц, и преподобных жен и святителей и преподобных отец по образу и по подобию, по существу смотря на образ древних живописцев и знаменовати с добрых образцов. 

А еще которые нынешние мастеры живописцы тако обещавшеся учнут жити и всякия заповеди творити и тщание о деле Божий имети, и царю таких живописцев жаловати, а святителем их бречи и почитати паче простых человек. Такоже тем живописцем приимати учеников и их разсматривати во всем и учити о всяком благочестии и чистоте и приводити ко отцем духовным. Отцы же их наказуют по преданному им уставу от святителей, како подобает жити хрестьянину кроме всякого зазора и безчинства. И тако от своих мастеров со вниманием да учатся, и аще которому откроет Бог таковое рукоделие и приводит того мастер ко святителю. Святитель же разсмотрев аще будет написанное от ученика по образу и по подобию и увесть известно о житии его, еже в чистоте и всяком благочестии по заповедем живет кроме всякого безчинства, абие благословив наказует его и впредь благочестно жити и святаго одного дела держатися со усердием всяцем. И приемлет от него ученик той честь, якоже и учитель его паче простых человек. 

По сих же святитель наказует мастера, еже ему не поборати ни по брате ни по сыне ни по ближних. Аще кому не даст Бог таковаго рукоделия, учнет писати худо или не по правильному завещанию жити, а он скажет его горазда и во всем достойна суща и показует написание инаго а не того, и святитель, обыскав, полагает таковаго мастера под запрещением правильным, яко да и прочий страх приимут и не дерзают таковая творити, а ученику оному иконнаго дела отнюдь не касатися. 

А еще которому ученику открывает Бог учение иконного писма и жити учнет по правильному завещанию, а мастер учнет похуляти его по зависти, дабы не приял чести, якоже он прият, святитель же, обыскав, полагает таков мастера под запрещением правильным, ученик же приемлет вящшую честь. Аще кто от тех живописцев учнет талант сокрывати, еже ему Бог дал, и учеником по существу того не отдаст, таковый осужден будет от Бога с сокрывшим талант в муку вечную. 

Аще кто от самех тех мастеров живописцев или от их учеников учнет жити не по правильному завещанию до пьянстве и нечистоте и во всяком безчинстве, и святителем таковы в запрещении полагати, а от дела иконного отнюдь отлучати и касатися того не велети, боящеся словеси реченнаго: проклят творяй дело Божие с небрежением. А которые по се время писали иконы не учася самовольством и самоволкою и не по образу, и те иконы променяли дешево простым людем поселяном невеждам, ино тем запрещение положити, чтобы училися у добрых мастеров. И которому Бог даст – учнет писати по образу и по подобию, и тот бы писал; а которому Бог не даст – и им вконец от таковаго дела престати, да не Божие имя таковаго ради писма похуляется. И аще которые не престанут от таковаго дела, таковии царскою грозою накажутся и да судятся. И аще они учнут глаголати: “Мы тем живем и питаемся”, и таковому их речению не внимати, понеже не знающе таковая вещают и греха себе в том не ставят. 

Не всем человеком иконописцем быти, многа бо и различна рукодейства подарована быша от Бога, имиже человеком препитатися и живым быти и кроме иконного писма, а Божия образа во укор и в поношение не давати. Такоже архиепископом и епископом по всем градом и весом и по монастырем своих предел испытовати мастеров иконных и их писем самим смотрити и избравше койждо их во своем пределе живописцев нарочитых мастеров да им приказывати надо всеми иконописцы смотрити, чтобы в них худых и безчинных не было. А сами архиепископы и епископы смотрят над теми живописцы, которым приказано и брегут таковаго дела накрепко, а живописцев онех брегут и почитают паче простых человек, а вельможам и простым человеком тех живописцев во всем почитати и честны имети за то честное иконное воображение. Да и о том святителем великое попечение и брожение имети комуждо во своей области, чтобы гораздые иконники и их ученики писали с древних образцов, а от самосмышления бы своими догадками Божества не описывали. Христос бо Бог наш описан плотию, а Божеством не описан. Якоже рече святый Иван Дамаскин: “Не описуйте Божества, не лжите слепии. Просто бо невидимо и незрительно есть, плоти же образ вообразуя поклоняются и верую и славлю рождьшую Господа Деву”. А иже от хитрых и гораздых мастеров живописцев укрыет который талант, что ему Бог дал и иных не научит и не укажет, да будет от Христа осужен с скрывшим талант в муку вечную. И того бо ради живописцы учите учеников без всякого коварства, да не осужены будете в муку вечную.