Стоглавый Собор: О пиянственном питии

ОТВЕТ О ПИЯНСТВЕННОМ ПИТИИ. СОБРАНИЕ ОТ БОЖЕСТВЕННАГО ПИСАНИЯ ЯКО НЕ ПОДОБАЕТ ВО ОБИТЕЛИ ПИТИЮ БЫТИ ОТ НЕГОЖЕ ПИЯНЬСТВО БЫВАЕТ. 

ГЛАВА 52

Понеже бо пьянство начало и конец всем злым. Того ради Господь наш Исус Христос глаголет: “Блюдите себе, да не когда отягчают сердца ваша объядением и пьянством”. И апостол Павел глаголет: “Не упивайтесь вином – в немже есть блуд”. И паки рече: “Пияницы и блудницы царства небесного не наследят”. 

Потом же великий Семион Дивногорец, славный чюдотворец, от рече: “Похвала мнихом не пити вина. И во старчестве речено быстъ: аще мних еси, то бегай от вина аки от змия”. Такоже святому великому Василию кесарийскому явися Пречистая Богородица во сне, глаголя: “Аще хочеши друг мой быти и во всем помощницу мя имети, то отрцыся вина и пьянственнаго пития”. Он же возбнув дивися заповеди Пречистыя Богородицы и до кончины живота своего заповедь Пречистыя Богородицы соблюде не пияше вина. И сия сам Христос отрече и Пречистая Богородица, и божественнии апостоли, и святии его пиянственное питие не токмо простым но и святым его. 

Коль же паче нам слабым суще в нынешнем последнем роду от таковых удалятися и бегати, аки от змия пъянственнаго пития. И великий Василий глаголет: “Яко дым прогонит пчелы, тако и пьянство Святого Духа прогонит, понеже пьянство есть дверь страстем, осквернением вождь, блуду делатель, волны сквернением, море помыслом, глубина неизреченных нечистот, блядословие, смехотворение, нечювствием дерзость, несытство, безболезнение душевное, напоминание смертное, безнадежие и отчаяние, иже всех лютейши, от негоже бывает души падение и ума преступление”. 

Глаголет же святый Иоан Златоуст: добре убо рече святый апостол Павел, понеже убо многащи глаголах. Ныне же плача глаголю о вразех креста Христова, имже бог чрево и слава студ их, иже бо чрево насыщаяй излишне и блудно и пьянственно живый сей есть враг Христов. Объядайяся и упивайяся тело погубляет с душею. Видите, яко упивайяся беснаго горши есть, бес бо Божиим упущением томит человека, а пьянственный же самохотением огубляется, слины бо в нем возгнившаяся смрадом воняют, и рыгание зло, яко скотина; то помысли как пьянаго душа, яко в яме и тине грязнет в телесе. 

Мнози убо неразумныи глаголют, яко той праздник честен есть, да пием и веселимся. Разумейте сами, безумнии, что сие глаголете. Яко оставльше праздник Божий и дияволу угожаете, яко паче Христа изволисте дияволу работати. Праздники же не Божия чтете, но диаволя, егда ся объядаете и упиваете и блудите. Аще бо в церковь входите како Бога прославите поведите ми, яко пияна смрад отрыгающаго толма бо ненавидит Бог пиянаго, якоже ся мы гнушаем пса мертва смердяща. Хотяй же всех сих избыти, да возненавидит пиянство, и сим змиеву главу отрежет и все тело сокрушит. 

Подобает же убо прежде всех много попечение и тщание имети о сем, яко да не будет в обители, ниже в трапезе, ни в келиях пития, от негоже бывает пьянство, яко да не будет врагом нашим в посмех и в поругание чювственным же и мысленным. Аще бо и правила святых отец и типицы великих монастырей повелевают иноком пити вино в подобно время егда подобает, а не всегда. Овогда же по три чаши, овогда по две, овогда по единой. Имеяху бо вино во всех монастырех и в древних и в нынешних, но до пиянства его не пияху. Якоже свидетельствуют мнози человецы благородныи, такоже и иноцы бывшии в Констянтине граде и во святей горе Афонстеи, и во иных тамошних местех, яко не токмо иноцы, но и еси православнии християне пиянства ненавидят и гнушаются, и вино убо еси имеют от пьянства же, аки от тлетворного недуга отбегают. Таков убо обычай земля тоя, и се есть неписан закон земский обычай, и ин закон: аще имеем питие пьянственное, не можем воздержатися, но пием до пьянства. А еже повелевают отцы святии пити по чаши или по две, или по три, сего мы ниже слышати хощем, ниже ведаем меру чаш онех, но сицева мера наша есть егда пияни – будем, якоже себе не познати, ниже помнити множицею даже и до облевания, и тогда перестанем пити. И таковаго ради обычая и погибельного нрава и греховного навыковения не подобает во обители имети пиянственнаго пития, яко да не в конечную погибель и в блудный ров впадем, еже от пьянства случается бывати, подобает же убо соборным братиям попечение о сем имети. 

Яко да увидят брата пияна на монастыри или где инде, или уведают у кого питие, или видят на трапезе питие, от негоже пьянство бывает, они же никакоже да умолчат, но да возбранят и запретят ктому таковая не творити. И того ради духовные пастырие честныя архимариты и игумены и строители многих святых честных монастырей общих и особь сущих собравшимся во царствующем граде Москве в царских палатах по совету благочестивого царя государя великого князя Ивана Васильевича всея Русии самодержца и по благословению отца его преосвященного Макария митрополита всея Русии и всего священного собора самобывшим ту архиепископом и епископом руския митрополия, якоже и преди рекохом, соборне изволиша еси Бога ради и своего ради спасения душевного вкупе и телесного, и брегучи церковных чинов по священным правилом и монастырского строения и своей братии о Христе единородных и безсмертных душ по Господни заповеди, отныне изволиша с Божиею помощию, доколе Господь повелит и поможет, в митрополии и во архиепископьях, и епископьях, и по всем святым честным монастырем общим и особь сущим, такоже и по девичим монастырем общим и особь сущим пиянственнаго пития, сиречь хмельного и вина горячаго, не держати и не пити, а держати и пити святителем и по всем святым монастырем и священноиноком, и дияконом, и иноком, и игуменьям, и старицам житныя и медвеныя всякия квасы по своим обиходом, а фряжьские вина, где обрящутся, да испивают якоже устав повелевает в славу Божию, а не в пиянство, занеже пьянственное питие всем вконец отречено бысть по священным правилом святых апостол и святых отец, нигде бо рече Божественное Писание, что не пити вина, но не пити вина в пиянство. 

А по которым святым честным монастырем общим и особь сущим духовные настоятели архимариты и игумены кийждо их о Христе с своею братиею производят и восхотят по Евангелию вконец нестяжательное и совершенное общежительство имети и проходити Бога ради церковныя чины и монастырские службы; и строение, и о пищи и о одежи, и о всяком келейном пребывании, и о всем по преданию святых апостол и богоносных святых отец по священным правилом ничтоже претворяюще, якоже и преди рехом, и таковии от Господа Бога сугубую мзду восприимут противу своих трудов, и Царству Небесному наследницы будут со всеми святыми в безконечныя веки. Аминь. 

А у Живоначальные Троицы в Сергееве монастыре о гостех и о келарской закон не лежит, занеже то место чюдотворное. И гости безпрестанные день и нощъ, и они живут по чюдотворцову уставу. Да в великих же честных монастырех стригутся князи и бояре и приказные люди великие и немощи или при старости, и дают вкупы великие и села вотчинные по своих душах и по своих родителех в вечной поминок, и тем за немощь и за старость законов не полагати о трапезном хождении и о келейном ядении; покоити их по разсужению ествою и питием, про таких держати квасы сладкие и черствые, и выкислые – кто какова требует, и ества такоже, или у них лучится свой покой, или от родителей присылка, и о том их не истязати же.